جنیوا: زوریں بیگواھیانی بابت ءَ میان استمانی بنداتی مراگش ءَ بلوچ نیشنل موومنٹ ءِسرکماش ڈاکٹر نسیم ءَ گوں رسانکدر ءَ تران کرتگ ءُ گوشتگ کہ اے مچی ءَ اکوام متھدہ ءَ ھوار انسانی ھکانی گل ءُ اکوام متھدہ ءِ جھلی ادارہ ھوار اَنت زوریں بیگواھیانی بابت ءَ دو روچی مچی یے کہ جنیوا ءَبرجاہ اِنت ایشی ءِ تہءَ بی این ایم ءِ ھوار بوگ ءِ مول ھمیش اِنت بلوچستان ءَ زوریں بیگواھی ءُ زوراکیاں دیمءَ بیار ایت۔
آئی ءَ گوشتگ کہ اے بی این ایم ءِ دری کارانی یک بھرےءُ ما یکشل ءَ بلوچستان ءِ جیڑہ ءَ جھان ءِ دیمءَ آشکار کنگ ءِ جھد ءَ کنگ ءَ ایں۔ اے دوچی مراگش ءَ جتائیں پروگرام بیتگ اَنت مئے نیمگ ءَ دو برءَ اکس پیش دارگ ءَ بیتگ اَنت، یکے بروکن چئیر ءِ کر ءَ بیتگ ءُ دومی میان استمانی مراگش ءِ بنجاہ ءِ تہ ءَ ھم بیتگ۔
ڈاکٹر نسیم ءَ گوشتگ کہ اے میان ءَ دوئیں روچانی تہ ءَ جتائیں وھد ءُ جتائیں بنگپانی سر ءَ جتائیں ادارھانی نیمگ ءَ نیاد بیتگ اَنت۔ بی این ایم ءِ سنگتاں جتائیں نیادانی تہ ءَ بھر زرتگ ءُ بلوچستان ءَ زوریں بیگواھی ءِ جیڑہ ءَ ھمے مردمانی دیم ءَ ایر کنگ ءِ جھد کرتگ دانکہ اے مردم سرپد بہ بنت۔
آئی ءَ گوشتگ کہ ما ھمے سرپد بہ ایں اے دو روچانی میان ءَ باز سوبین بیتگ ایں۔ اے میان ءَ سرکاری ءُ آدگہ اداراھانی مردمانی گون ءَ ھمےدرگت ءَ مئے گپ ءُ تران بیتگ۔ اے بابت ءَ ما بازیں مردمانی گون ءَ رازیگ بیتگ ایں ھواری ءَ کار کن این ءُ ما لوٹ ایں کہ اے درچ ءَ برجاہ بدار ایں۔ ما انوں ایشی ءَ آسر ءَ گندگ ءَ ایں گوں مردمانی پجاروکی بوگ ءَ اِنت ءُ ما ھمے اوست ءَ دار ایں کہ آھوکیں وھد ءَ ایشی جوانیں آسرے بیت۔
