تربت: شھرک دوراھی ءَ زوربیگواھیں مردمانی کھولاں زھرشانی ءَ شھدگ بند کرتگ۔ دوشی پاکستانی لشکر ءَ دگہ دو مردم آوار جتگ ءُ بیگواہ کرتگ۔
بنشون ءِ رد ءَ تُربَت ءِ جتاھیں ھند سامی بلوچی بازار، گونکی شھرک ءُ آپسر شاہ آباد ءَ پاکستانی لشکر ءِ دست ءَ زوربیگواہ کرتگیں ھشت مردمانی کھولاں چہ کیچ ءَ شال، پَنجگُور، آواران ءُ ھوشاپ ءَ روکیں شھدگ بند کرتگ۔
منیر اھمد ء میاہ، شیھک ء گلام کادر ءُ شکیل اھمد ء رند کہ سامی بلوچی بازار ءِ جاہ منند اَنت۔ زورگریں پاکستانی لشکر ءَ 12 جنوری ءِ شپ ءَ آپسر دوکرم ءَ پسانی پڑی ءَ آوارجتگ اَنت کہ آ انگت بیگواہ اَنت۔ ایشی ءَ ابید زاکر ء ھیدر، سالھ مھمد ء نوکاپ، یونس ء سوالی، دلسرد ء ھسن ءُ اجاز ء سوالی کہ آپسر شاہ آباد ءِ جاہ منند اَنت آیاں ھم زھرشانی ءَ بھر زرتگ ءُ نشتگ اَنت۔
زوربیگواھیں مردمانی کھولاں وتی مردمانی زوت آجو کنگ ءِ لوٹ کرتگ ءُ گوشتگ داں کہ مئے مردم آجو کنگ نہ بنت مئے زھرشانی برجاہ بیت۔
بنشون ءِ رد ءَ دوشی دو ءَ چہ تربت ءَ بیگواہ کنگ بیتگیں مردمانی نام بلال ء ھیدر الی ءُ اسمائیل ء ھیرمھمد اِنت کہ بھمن ڈنک ءِ جاہ منند اَنت۔ پاکستانی لشکر ءَ بیڑ برگءِ میان ءَ گوں جنین ءُ زھگاں زوراکی کرتگ ءُگس ھم پٹ ءُ پول کرتگ اَنت۔
