بلوچ یکجھتی کمیٹی ءِ سروک ڈاکٹر ماہ رنگ ءَ مچ بولان ءَ مچی ءَ تران کرتگ ءُ گوشتگ کہ بلوچستان ءَ چوشیں جاہ پشت نہ کپتگ کہ مردم ایمن بہ بنت، بلوچ راج ایردست کنگءُ در پہ در کنگ بیگ ءَ اِنت۔ بلوچستان ءَ بازیں لاش دزکپگ ءَ اَنت، مئے برات چہ گسانی تہ ءَ آوار جنگ ءُ رستری آزار دیگ ءَ پد آیانی لاش چگل دیگ بنت۔
آئیءَ گوشتگ کہ بلوچ راج ءِ مڈی لٹ ءُ پل بوگ ءَ پنجاپ ءَ وانگجاہ ءُ دگہ آسراتی دیگ بوگ ءَ اِنت ءُ بلوچان ءَ لشکری بنجل دیگ ءُ بلوچ چکچینی کنگ بوگ ءَ اِنت۔ بلوچ آوار جنگ بوگ ءَ اَنت۔ سرجمیں جھان ءَمردماں گپ جنگ ءُ مچی برجم دارگ ءِ ھک ھست بلے پہ بلوچ ءَ آئی ھکانی سر ءَ گپ جنگ ءَ پابندی اِنت۔
ڈاکٹر ماہ رنگ ءَ گوشتگ کہ بلوچستان ءِ مردمانی گون ءَ لوٹ کن ایں کہ وت ءَ وت ھم سنت بہ بنت ءُ بلوچ جھد ءَ ھوار بہ بنت چی ءَ کہ اے وھد ءَ بلوچ ءَ را یکجاہ بوگی اِنت۔ بلوچءَ را سیاست ءَ بھر زورگ ءُ پہ وتی آزیزاں توار چست کنگی اَنت۔
آئیءَ گوں مردماں لوٹ کرتگ کہ دالبندین ءَ بیوکیں راجی مچی ءَ بھر بزور اَنت ءُ راجی مچی ءَ سوبمند بہ کن اَنت۔
