گل ءِ ساڑا | نبشتہ ءُ توار : کازی ریھان

ڈاونلوڈ | گل ءِ ساڑا

سرگال : گل ءِ ساڑا
نبشتہ کار: کازی ریھان
البم: گل ءِ تْرانگ
دراجی :00:04:00
وزن:4.60 ایم بی

ٹیگز: #گلام_مھمد_گل | #گل_ءِ_ساڑا | #کازی_ریھان | #زرمبش_زیمر

نکان

گُل ءِ ساڑا

دنیا ءَ چوشیں سرپدیں بلوچے نیست کہ آ چَہ شھیدواجہ گلام مھمد بلوچ ءِ کارست ءُ کرد ءَ پجاروک مہ بیت ۔رکارڈانی پد ءَ 1959 ءَ بلوچانی نامی ئیں دیار ملاپازل ءِ ھنکین مند ءَ واجہ ایوب اُمرزھی رند ءِ لوگ ءَ ودی بیتگیں گلام مھمد درکسانی چَہ وتی ھمسریں بیلاں جتائیں تبے ءِ واھند اَت ۔ چوش نہ اَت کہ واجہ چَہ وتی ھمسراں یکین اَت کہ نودربرانی جوڑ کرتگیں گل بی ایس او ءِ باسک اَت بلکیں آ تب کہ چَہ درساں جتا اَت مادنیں کشکے ءَ بلوچ ءِ راھشونی کنگ ءِ تَب اَت کہ شھیدواجہ ءَ وتی دستونکے ءِ تہ ءَ اے تب سرھیلی ءِ نام داتگ ۔ پمیشکا نا کہ واجہ نامداری ءِ لوٹوک اَت بلکیں آ سرپد اَت کہ آئی ءَ یک گرانیں گٹے بُرگی ءُ پہ راج ءَ مادنیں کشکے رَندگی اِنت کہ ھرکسی وسی کارے نہ اِنت ءُ دپتر گواچن اِنت کہ آئی ءِ ھمراھی ءَ پہ راج آجوئی ءَ لانک بستگیں کوھیں بالاد کانچ ءَ ڈُر اِت اَنت ۔

اے نیزگار گوں وتی ھشکیں کَلی ءُ ڈکیں توشگ ءَ دیم ءَ جنز اِت زند ءَ چوشیں ساھتے نیست اَت کہ شھیدواجہ ءَ پہ تاھیری گوازینتگ ۔ واجہ ءِ دپتر ءَ نبیس اِتگیں شئر آئی ءِ زند ءِ آدینک اَنت ۔

رُستگ آں بیلاں بزگ ءُ واری
پُرگمیں روچانی کرتگ دیمداری
گوستگیں کرن ءَ جبر من دیستگ
کہ سگ اِتگ گژن ءُ دائم ناداری

بلے پد ءَ ھم آئی ءِ جبزگ ءُ مارشت مھکم اَت اَنت ءُ باور اَت ئِے کہ :

کس نہ بارت باج اَچ منی باسکاں
گوں بد ءُ ڈنگاں من ءَ ھست اِنت دَینداری

باور نہ بیت کہ ماں سیاسی پِڑ ءَ دنیا ءِ گیدرتریں راھشون کہ آئی ءِ زبان ءَ پہ وتی راج ءِ بدواھاں مدام نپت ءُ بیر گوار اِتگ زگر ءُ شکرگالیں بلوچی ءِ لھتے نامداریں شائراں ھوار اِنت ۔ ماں شائری ءَ گلام مھمد گل ءِ نام ءَ نام کش اِتگیں واجہ ءَ نا ایوک دْرینگالیں لچہ ءُ دستونک پر بستگ بلکیں برے برے گوں وشیں توارے ءَ الھان ھم کرتگ ماں واجہ ءِ توار ءَ بازیں پیت بند ءُ رکارڈے دَنیگت دست نہ کپتگ بلے ھما شئر کہ آ دور ءَ بلوچی ءِ نامی ئیں گشندھاں گْوشتگ اَنت ءُ وتی نوبت ءِ نامی ئیں سوت بیتگ اَنت ‘ زرمبش شنگکار ءِ توار ءُ تامری تک ‘ بزاں آڈیو اینڈ ویڈیو ڈیپارٹمنٹ ءَ ‘ گل ءِ تْرانگ ‘ ءِ نام ءَ یکجا کنگ ءَ پد چَہ شھید غلام محمد اکیڈمی ءِ نیمگ ءَ شنگ کرتگ اَنت اے رِد ءَ ما زرمبش ءِ کمک کنوکیں درسیں پروڈکشن ءُ گشندھانی منتوار اِیں کہ پہ اے سوگات ءِ یکجا کنگ ءَ گوں ما ھمشور ءُ ھم دست بیتگ اَنت ۔