بلوچ راجی زرمبشت ( بی این ایم ) ءِ رسانکدری کارگشاد کازی داد مھمد ریھان ءَ ماں چاگردی رسانکدر ءِ تندجاہ ایکس ءَ وندر ویل ءِ پژدر ءَ شنگ کرتگیں درشانے ءَ گوشتگ زوراکیانی درچ ءِ ھلاس کنگ ءِ تیوکیں راہ بلوچ راجی آجوئی اِنت۔ مارا ناھکیانی بگیری ءَ وتی جھد ءَ یکجاہ بوگی اِنت۔
آئی ءَ گْوشتگ کہ مروچی ’ گاڑی ڈرائیور اتا اللہ ء پلیان ھان ‘ برجاھیں زوراکیانی آماچ بیگ ءَ پد بیران بوتگ۔ انیگیں جاور چہ ما ھواریں جھد ءِ لوٹ ءَ کن اَنت ۔ ما گندگ ءَ ایں کہ ھما کس تچکے ءَ گوں جنگ ءَ ھوار نہ اَنت ، گوں لشکر ءَ نہ مڑگ ءَ اَنت پد ءَ ھم آ کشگ بیگ ءَ اَنت۔ پہ اے جاورانی آسر کنگ ءَ مئے آجوئی ءِ زْرمبشت ءِ بھر بیگ ھژدری اِنت۔
کازی ریھان ءَ گْوشتگ ، بلوچستان، سند ءُ پکتونوا ءَ مزنیں کچے ءَ زھرشانیاں پد ھم بلوچ چکچینی برجاہ اِنت۔ پاکستانی لشکر ءَ دست ءُ گوشیں شھریانی سر ءَ تیرگواری برجاہ داشتگ۔ ھمے دْرچ ءَ وندر، ھب، بلوچستان ءَ کوسٹ گارڈ ءِ دست ءَ بوتگیں انوگیں درناکیں کوش ھم ھوار اِنت۔ اے لشکر ءِ گیشتریں کارمند پنجاپی اَنت کہ بلوچستان ءِ تیابدپ ءَ پہ شپکی ءِ گر ءُ دار ءِ نیمون ءَ نادینگ بیتگ اَنت بلے اے وتی کار ءِ جاہ ءَ چہ بلوچاں باج گرگ ءُ آیاں ترس ءِ آماچ کنگ ءَ اِنت۔
آئی ءَ گوں میان استمان ءَ لوٹ کرتگ ، میان استمان بلوچ چکچینی ءِ دارگ ءَ دزمانجنی ءُ وتی زمہ واریاں پیلو بہ کنت۔ اے تک کمو گھتری الم ءَ اتکگ بلے میان استمان ءَ پہ دیرمانیں مٹی ءَ وتی زور ءُ پلہ مرزی برجاہ دارگی اَنت۔بلوچ ھر جاہ ہ نشتگ اَنت ھم مشت بہ بہ اَنت، وتی سْرپاں تچک ء‘ راست بہ کن اَنت ءُ ھرچ تک ءَ دژمن ءَ ترندیں پسو بہ دے اَنت۔