سیندک نا سیاسی و السی تپہ آتا پاننگ ءِ کہ سیندک پروجیکٹ پیہُنو پیل اس جوڑ مسنے، 20 سال آن پد ہم ہندی مخلوق ءِ روزگار اف۔
سیندک نا سیاسی و السی تپہ آک تینا شنگ کروک بیان ئٹ پاریر کہ سیندک پروجیکٹ ایم آر ڈی ایل کمپنی ہندی مخلوق تون تدوکا 20 سالو آن باز ناروا روشت تخانے، کمپنی ننت زند ئنا غٹ آسراتی تینا پد بٹینے، بجلی روزگار آن ہلیس تعلیم، دیر و جانجوڑی اسکان آسراتی رسینگپک، داسا پین 15 سال نا معاہدہ ہلیسہ تینا دروغ آ کسہ آتے بناء کننگ خواہرہ۔
ہندی بندغ آتا پاننگ ءِ کہ سیندک نا مخلوق نا کُل آن بھلا ویل دا وخت آ بجلی نا ءِ، سیندک پروجیکٹ دا پیہُنو پیل اس جوڑ مسنے وار وار آ باور تننگ آن بیدس ہم اوفتا خف تیا بوڈ اس کنپک، ہزار آ خواست آتے تریسہ نن ہم دمدرینگان۔
او پاریر کہ نن باز لحاظ کرین و سگ ئنا دو ءِ الیتون کہ مننگ کیک چائنیز منیجمنٹ و اوفتا سنگت پاکستانی افسر آک تینا قبلہ ءِ راست کیر ولے او ننا خُلکنی آن سواد ہرفیسہ ننے غٹ آسراتی تیان ہامدریکا پد تخار، داسا ننے ٹی سگ ئنا گنجائش اف و ودیک ننا ہیت و تران ئٹ خُلکنی مروف۔
او پاریر کہ دا وخت آ سیندک نا کیہی ورنا تے روزگار اف و پیشن آن بروکا بندغ آک بھرتی مننگ ءُ، بجلی نا بست و بند ہم خراب ءِ، 15 سال مُست دا باز کم وولٹیج نا بجلی ننت تسر ہرادے پدان اسہ وار ہم اپ گریڈ کتنو، ہرا نا سوب آن دا باز بے کار مسنے و دافتا تراکا نزور آ ٹرانسفارمر آک ہم بے کار مسنو ہرا گھنٹہ آتیٹ 10 وار ٹرپ مریرہ داسا نن اوفتے پین خواست تفرون۔
ہندی مخلوق نا پاننگ ءِ کہ نن سیندک پروجیکٹ و اوفتا تروکا سی ایس آر فنڈ آن ہراڑان تینٹ سیندک پد تموک ءِ ایم آر ڈی ایل بست و بند ءِ 10 فروری اسکان نا وخت ایتنہ کہ او تینا قبلہ ءِ راست کے نہ تو تیوہ علاقہ نا پیر و ورنا غٹ ترند برانز کرور و نن تینا برانز نا پلویڑ ءِ گیشتر تالان کرون۔
