بلوچستان نا بنجائی شار شال ریڈ زون ئٹی مری اتحاد تولوک برانز ءِ ایسر کننگ نا پڑو کریسہ پارے کہ ننا خواست آک پورو مسنو۔ ایلو کنڈ آن برانز ئٹ اوار ورناک نعرہ خلیسہ پاریر کہ برانز سی ٹی ڈی نا دو آن بیگواہ مروک بلوچ مسڑ ماہل نا آجوئی اسکان و ایلو خون مروک بندغ تا چاہنداری مننگ اسکان برجاء مرو۔
ایلو کنڈ آن ماھل بلوچ نا آجوئی کن تولوک برانز شال کمشنر آفس و ڈپٹی کمشنر آفس نا مونا ہم برجاء ءِ۔
مری اتحاد نا سروک جہانگیر تینا بیان ئٹ پارے کہ آجو مروک چُنا نیاڑی تے زرہ سے آن گڈ مجسٹریٹ نا مونا پیش کرور مجسٹریٹ نا مونا بیان آن گڈ اوفتے میڈیا نا مونا ہتور۔
او پارے کہ لمّہ و مسڑ تومکا تتون جنسی زیادتی کننگانے، ہرا نا میڈیکل کن تومکا تے کراچی آ رادہ کننگو۔
اندن خان محمد مری نا زائفہ نا دعویٰ ءِ کہ کہوکا تومکا مارکو تیان اسٹ اونا مار اف ہراڑکن ڈی این اے کننگو۔
