بلوچستان ئٹی خوانندہ آتا برجاء زوراکی نا بیگواہی تا چھول ئنا برخلاف بلوچ اسٹوڈنٹس کونسل نا کنڈ آن پاکستان نا صوبہ پنجاب نا شار فیصل آباد ئٹی برانزی ریلی ئس کشنگا۔
بلوچ اسٹوڈنٹس کونسل نا کنڈ آن ریلی ٹی فیصل آباد ئٹی خوانوکا بلوچ خوانندہ، چاگڑدی تنظیم آتا باسک آتون اوار بیگواہ صحافی مدثر نارو نا لمّہ اوار مس۔ برانزیک دا وختا دو تیٹ پلے کارڈ ہرفیسر و بیگواہ بلوچ خوانندہ آتا آجوئی نا خواست کننگ اسر۔
فیصل آباد برانز نا بابت ئٹ بلوچ اسٹوڈنٹس وفاق و پنجاب نا ترجمان آک تینا شنگ کروکا بیان ئٹی پاریر کہ ریاستی ادارہ آک اشتماعی سزا ٹی بلوچ خوانندہ آتے ہڑدے ئی بنیاد آ ٹارگٹ کریسہ زوراکی ئٹ بیگواہ کننگ ءُ ہرا بھلو وخت ئسے آن برجاء ریاستی پالیسی نا لڑ ئسے۔ بلوچستان نا خراب مروکا حالیت نا سوب آن بلوچ خوانندہ آک تدوکا اِرا دہائی آن ریاستی ادارہ آتا آسان ہدف جوڑ مسنو و اشتماعی سزا نا گواچی ءُ۔
بلوچ خوانندہ تیا کریک ڈاؤن و اوفتا بیدس عدالت زوراکی نا بیگواہی تا چھول ئٹی ترندی بلوچ خوانندہ آتیکن کلہو ئسے کہ او ہچو جاگہ سے آ رکھوک افس۔ بلوچ خوانندہ آتے علم و شعور و خواننگ نا عمل آن مُر تخنگ دا ریاست نا بھاز ہُرے نا پالیسی ئسے۔ ہندا پالیسی نا سوب آن یونیورسٹی، کالج و اسکول آتیٹ ہم بلوچ خوانندہ آک رکھوک افس۔
