بلوچستان نا ضلع کیچ ئنا مرکزی شار تربت آن تدوکا دے تیٹی اسہ وار ئس پین بیگواہ مروکا زمان نا خاہوت کراچی ٹی پریس کانفرنس کرے ۔
پریس کانفرنس ئٹی وائس فار بلوچ مسنگ پرسنز نا وائس چیئرمین ماما قدیر بلوچ و سیکرٹری جنرل سمی دین بلوچ و وہاب بلوچ ساڑی اسُر۔
زمان بلوچ نا خاہوت پریس کانفرنس کریسہ پارے کہ اینو نن تربت آن بےگواہ مروکا زمان بلوچ ولد سپاھان نا خاہوت پریس کانفرنس کننگ ئٹی اُن۔سکیورٹی ادارہ و عدلیہ توں اوار پین ہچو ادارہ ئسینہ نیمہ آن شنوائی مفننگ نا سوب آن اینو نا توسط آن تینا کیس ءِ میڈیا ٹی ہتنگ ئٹی اُن ۔ زمان ولد سپاھان ہراکہ کیچ ئنا عیلاقہ بالگتر نا تولوک ئسے اودے 10 فروری 2020 جمعہ نا دے آ تربت بازار آن زورانسری بیگواہ کننگ مس و 2 دے گدرینگان پد دسکاں اونا ہچو حوال ئس افک ، نن اونا کسرے ہُننگ ان ۔
اودے اول وار آ بیگواہ کرنگ نہ بلکہ اونا ایلم ءِ ہم جون 2020 ئٹی بیگواہ کننگا ، ارادے شش تو ئنا سزا تننگ آن پد یلہ کننگ مس ، داسہ پدا ابید عدالت آن زمانءِ بیگواہ کننگانے ، دا چکری اُرا تہ چادر و چھار دیواری تہ پامالی کننگ مسونے، زالبول و چُنا آتا زی آ تشدد کننگ مس ، قیمتی آ گڑاتے پرغنگ و درنگ مس ، ننے زدکوب کننگ تون اوار دا ہم تڑی تننگا کہ پدا بسون نما زالبول آتے ہم درون ۔
او پارے کہ پک مرے ننا خاہوت ئے بھاز وخت آن ہندُن تنگ کننگو ، منہ دے مُست ننا اسہ بندغ ئسے ایف سی نا لاری ٹکر ئس خلنگ آن پد تشدد نا گواچئ کرے ،نن جمہوری ءُ بندغ اُن ملک ئنا کُل پابندی تا پابند مننگ آن پد ہم ریاستی غنڈہ گردانہ رویہ سمجھ آن بلُنءِ ۔
نن لس مخلوق اُن خبر اف انتے ننے داڑان بیدس ہم سزا تیرہ ، نن سرکار آن پین ہچ خواپنہ بیرہ ننا خاہوتءِ سزا تفس ، زمان نا زندگی خطرہ ٹی ءِ ،سیکیورٹی انسانیت تو ہمدردی کریسہ اودے یلہ ہیتر۔ نن اپیل کینہ کہ ننا خاہوت نا حفاظتءِ کیر و ننا احتجاج آتا نوٹسءِ ہلیر نن ہم احتجاج نا حقءِ تخینہ۔
