بلوچستان نا ضلع خضدار نا ہندی پنچ سال آن جبر ئٹ بیگواہ آ رشید بلوچ نا لُمہ تینا چُنا نا کسر آ ہُریسہ کذیت کرے۔
خاہوت نا رد ئٹ تدوکا شام رشید نا لُمہ ءِ اُست ئنا دڑد ہلک و او کذیت کریر۔
بیگواہ آ آصف نا ایڑ و رشید نا خڑک ئنا سْیال سائرہ بلوچ دا تدینی ءِ پک کریسہ چاگڑدی میڈیا سائٹ ٹوئٹر آ نوشتہ کرے کہ" دیر پائک ریاست لُمہ مریک، دا وَ لُمہ آتے کُننگ ءِ ۔ بیگواہ آ رشید نا لُمہ تینا چُنا ءِ خنس ہننگ کن ہروک اس و کذیت کرے۔"
او پاریر " اگہ آخری ساہت آ کلمہ نا جاگہ تینا بیگواہ آ مار ئنا پِن مرے، دا لُمہ آتا اُست آن پیشتموکا بدُعاک دا ادارہ آک عبرت نا نشان مرور"۔
31 اگست 2018 ٹی پاکستانی لشکر نوشکی ٹی زنگی ناوڑ پکنک کن ہنوکا دہ بندغ ءِ دزگیر کرے،بیگواہ مروکا بندغاتا عکس آتے ہم شینک کننگاسس۔
واہم پدا ہندا بندغ آتے بیگواہ کننگا۔ بیگواہ مروکا بندغ آتیتی ایلوفتے اِرا سال نا مُدت ئٹی یلہ کننگا ولے اوفتون بیگواہ مروکا آصف و رشید انگہ بیگواہ ءُ ۔
بیگواہ مروکا آصف و رشید نا یلہ مننگ کن اوفتا خاہوت آک کوئٹہ،کراچی و اسلام آباد ئٹی تینا برانز آتے ریکارڈ کرینو و دا رد ئٹ بیگواہ آ بندغ آتے کن کمیشن تیٹی ہنسا مسونو واہم اوفتا ایلُم تے یلہ کننگ متنو۔
