کُلانچ: گْوادر نا ہند کُلانچ ئٹی زوراک آ پاکستانی لشکر اسہ ورنا سے دزگیر کریسہ بیگواہ کرینے۔
حوالکار نا رد ئٹ زورانسری بیگواہ مروکا ورنا نا پجار حیمد ولد شہید بابو مہراب نا پن ئٹ مسونے ہرا کُلانچ اَمبی بیلار نا ہندی سے۔تدوکا شام پاکستانی لشکر نا ڈکھوک آ ادارہ آتا بندغ آک اودے دزگیر کننگ آن پد بیگواہ کرینو کہ انگا بیگواہ ءِ ۔
حوال آتا رد ئٹ دا خاہوت مُدام پاکستانی لشکر نا زوراکی تا گواچی ءِ ۔ زورانسری بیگواہ مروکا حمید نا باوہ بابو مہراب ءِ زوراک آ پاکستانی لشکر 2014 ٹی دزگیر کننگ آن سال اس پد یلہ کرے۔ ارٹمی وار اودے 11 اگست 2018 کُلانچ آن بیگواہ کرے و مُسہ دے آن پد اونا سُم ئٹ خلوکا جون اونا باوہ پیرئی ہند کُلانچ آن دو تماسَس۔
ہندا وڑ بیگواہ حمید نا ایلم حیدر ءِ ہم 2012 ٹی دزگیری آن پد اونا خاہوت آن زر ہلِّنگا و اِرا ہفتہ آن پد اودے یلہ کننگا۔
اوفتا پاننگ ءِ کہ دا خاہوت نا بازنگا بندغ آک سال آتان زیات مریک کہ بیگواہ ءُ و باز انگا بندغ آتا جون آک ہم رسینگانو۔ خاہوت حمید نا بیگواہی آن خُلیس نا گواچی ءِ ۔
تدوکا دے تْلارُک جل ئٹی پاکستانی لشکر نا زی آ بی ایل ایف نا سُہبمَنْد آ جلہو آن پد ہیب کھیب زوراک آ پاکستانی لشکر نا زوراخی برجاء ءِ ۔
تدوکا دے کیچ ئنا نیمہ آن پاکستانی لشکر نا ہژدہ لاری تا کاروان و اسہ جنگی جہاز ئس ہندا جاگہ ٹی خننگاسَس۔
دا رد ئٹ ننا شابیتی سر سوج برجاء ءِ ۔
