خضدار نا ہندی عبدالحفیظ زہری ہرادے تدوکا سال ئنا 27 جنوری آ دبئی آن او جاگہ نا ڈھکوکا ادارہ نا کارندہ غاک زوراکی ئٹ بیگواہ کننگ آن گڈ پاکستان نا دوٹی کریسر و منہ تُو مست او کراچی آن پاش کنمگا و بیدس ڈوہ آن کراچی نا جیل ئٹی تخنگاسس۔
اینو ہرا وخت اودے خلاصی ملا تو اونا خاہوت اودے سینٹرل جیل کراچی آن اُراغا دریرہ کہ شام ئنا ہفت بجہ نا خڑک پیہن ءُ ارا گاڈی تیٹی مونو پچ بینوک ڈھکوک ادارہ غاتا بندغاک اوڑا جلہو کریر ۔
عبدالحفیظ زہری نا ایڑ ئنا مسڑ و بیگواہ عبدالحمید نا مسڑ سعیدہ حمید ہم خاہوت ئتون تُد ئس و اونا جند ہم ٹپی ءِ ، تدینی نا سرجم ءِ پاریسہ اونا پاننگ ئس کورٹ آن ریلیز آرڈر رسینگ آن گڈ کہ نن ماما تون اوار اوکان پیشتمان تو ننے آ مونو پچ بینوک ڈھکوک آ ادارہ غاتا کارندہ غاک جلہو کریر و کنا ماما ءِ بھاز ٹپی کریر ، اونا رد ئٹ اوفتا غٹ آ جلہو و سمکاری کننگا، داسکان نا حوال آتا رد ئٹ عبدالحفیظ نا تب نا جوڑ ءِ و اونا اُرا والا تا بارو ئٹ ہم داسکان ءِ ہچ پاننگ مفک کہ اوفک بھلو خلیس ئسیٹی ءُ ۔
