اواری نا درشانی کروکا تیٹ پی ٹی ایم نا سینئر سروک فتح کاکڑ کوئٹہ آن عبداقیوم و سنگت آک گدان آ بسر۔ دا وخت آ وی بی ایم پی نا وائس چیرمین ماما قدیر بلوچ اوار مروکا تتون ہیت کرے و پارے کہ زوراکی نا بیگواہی، جشوک جونک، سیاسی باسک آتا ٹارگٹ کلنگ آبادی تیا ارش کننگ کوزہ گیر ریاست آتا ساندہ دود مسنے، ولے ہرا وخت بلوچ قومی تحریک جتا شیفی و بُڑزی تیان گدرینگیسہ مونی ہنا تو کوزہ گیر ریاست گڑینگیسہ ظلم و زوراکی تا سیم آتیان مُستی ہننگ بناء کرے ہرا داسکان برجاء ءِ۔ ہزار آ بلوچ فرزند آک زوراکی ئٹ بیگواہ کننگانو و دزگیری ٹی خون ئنا گواچی مریسہ ہزار آ بندغ آک شہید مسنو۔
زوراکی ئٹ بیگواہ مروکا بندغ آتا آجو مفننگ و دزگیری ٹی خون مننگ نا برخلاف بیگواہ آ بندغ آتا خاہوت آک وی۔بی۔ایم۔پی نا تلہ آن تدوکا ۱۴ سال آن ایمنی ئٹ جہد کننگ ءُ۔ برانز، ریلی، سیمینار، عدالت و کیمشن آتیٹ پیشی تتون اوار کُل آن مرغن آ بین برانز ئٹ جہانی ادارہ آتے بلوچستان نا حالیت نا کنڈ آ پان تننگ کن اہم کڑد ایسری تننگ ءُ۔
ماما قدیر بلوچ پارے کہ زوراکی ئٹ بیگواہ مروک بندغ آتا آجو مفننگ نا برخلاف وی بی ایم پی ظلم و زوراکی و بندغی حق آتا لتاڑ ءِ جہان نا مونا ہتنگ و زہم تخوک گام ارفیسہ تاریخ نوشتہ کرے پاکستانی ادارہ آتا دڑکو تے خاطر ئٹ ہتو و چرجوئی ئٹ جہد ئنا مثیل قائم کرینے۔
ولے افسوس ءِ کہ اسہ غلام قوم سے تون تعلقداری تخنگ نا سوب آن جہان دا جہد و دا نا کڑد آتے نظرانداز کرینے۔ انتئے کہ اینو نا دا سامراجی ڈیہہ ئنا اجارہ داری نا جہان ئٹ میڈیا نا معاشرہ ٹی مظلوم و محکوم آتا گواچنی جہد کروکا تا حوصلہ افزائی کننگ نا جاگہ غا آرٹیفشل کڑد و بندغ آتے مونا ہتنگ مریک۔ اندا سوب آتا بنیات آ میڈیا و جہانی ادارہ آک نظرانداز کرینو۔
اینو نا جہان ئٹ اِرا نیمئی بندغی حق آتا نعرہ آتا پد آ جہانی اجارہ داری تینا سواد آتا رکھنگ کاریم کننگ ءِ۔
