اواری نا درشانی کروکا تیٹ آل پاکستان مری اتحاد نا صدر میر محمّد ملوک مری، لیاری عوامی محاذ نا جنرل سیکرٹری عبدالخالق بلوچ، عوامی نیشنل پارٹی نا کامریڈ منور و ایلو اوار ئسر۔
وی بی ایم پی نا وائس چیئرمین ماما قدیر بلوچ پارے کہ اینو اگہ پاکستان نا وحشی و ظالمانہ عمل تے خوڑتی ئٹ ہُننگ مرے تو اڑزانی ئٹ دا سما تمک کہ پاکستانی ریاست و اونا ادارہ آک جنیوا کنونشن نا قانود آتیان اخس چپ ہِننگ ءُ۔ پاکستانی لشکر پاش تینا ڈوہداری تے منیک، ڈکٹیٹر مشرف پاریسس کہ اندن ہٹ کرون کہ سما تموف، اینو ہمو چرجوئی ئٹ بلوچ آتے ہٹ کننگ ءُ۔
ماما قدیر بلوچ ودیک پارے کہ پاکستانی لشکر بے ڈوہ آ شاری تے ہلیک و زوراکی ئٹ بیگواہ کیک تو اوفتیا بد حال و بے بندغی ءُ بےدادی کیک۔ حوال ہلنگ نا وختا اوفتا بدن تے ہریسہ تینا درندگی نا ثبوت ایتک و اوفتیا بےدادی تیان بندغ آک ساہ ایترہ۔ پدان اوفتا جون تے اشتماعی قبر آتیٹ کھڈ کیک یا جشیسہ خسیک تاکہ اوفتا چاہنداری مننگ کپ۔ جینوا کنونشن نا قانود آتا برخلاف دا غٹ جہانی عہدنامہ تا رد ئٹ جہانی قانود آتا مطابق بلوچ آتیا پاکستانی بربریت نا برخلاف باز پرس ءِ یقینی جوڑنگ و سزا نا باور تننگ دا غٹ جہانی پاسدار اوفتا قانودی ذمہ واری مریک کہ او پاکستان ءِ بلوچ آتیا دنو ظلم کننگ آن تورے۔
او پارے کہ پاکستان تو بھلو کچ اسیٹ شاری آبادی تیا گن شپ ہیلی کاپٹر آتا کمک ئٹ فضاںٔی بمباری کننگ ءِ ہرا نا مثیل بلوچستان نا جتا شار مکران آواران جھالاوان سراوان کوہلو ڈیرہ بگٹی و بلوچستان نا ایلو شار تیٹ ہراڑے ہڑدے پاکستانی لشکر لس مخلوق نا اُرا تیا بمباری کننگ ءِ و معصوم آ شاری تا ساہ تتو خونی گوازی کننگ ءِ تو دروغ ئناسہارا ہلیسہ معصوم و پیر انگا تا شہیدی ءِ مزاحمتکار آتا پن تننگک۔
