اظہار یکجہتی کروکا تیٹ بی ایس او نا سینئر وائس چیئرمین محمّد اشرف بلوچ اونا کابینہ نا باسک، پشتونخواہ میپ نا باسک آتون اوار ایلو نرینہ نیاڑیک اوار ئسر۔
وی بی ایم پی نا وائس چیئرمین ماما قدیر بلوچ پارے کہ کوزہ مروک بلوچستان ریاستی عتاب نا گواچی ءِ و ایہن تو دنو ہچو دے ئس اف ہرا دے خاص حوال بننگ مف کہ اینو ریاست تینا دو تے بلوچ نا دتر آن رنگ کننگ آن تورینے و ورنا تے زوراکی ئٹ بیگواہ کتنے۔ بلوچ زالبول تا زوراکی نا بیگواہی بیم تروکو عمل ئسے۔ بلوچ پر امن جہد ئٹ زالبول تا ودوکا کڑد ہرا وڑ پر امن جہد ءِ شعوری وڑ ئٹ لیس کننگ ءِ و زالبول تا تاریخی کڑد بلوچ قوم نا توار ءِ بڑزینکو تلہ آ پاش کرینے۔ بلوچ قبائلی و روایتی معاشرہ ٹی زالبول نا اُرا تیان پیشتمنگ و نرینہ آتون ہم کوپہ سلینگ نا بارو ئٹ دشمن سوچنگ ہم کتوکہ۔ ریلی، ہڑتال و برانز دا خاطر آن مننگ ءِ کہ بلوچستان ئٹ پاکستانی لشکر نا زوراکی تے جہان نا مونا ہتنگ مرے و جہان نا ضمیر ءِ بش کے کہ او بلوچ قوم نا نسل کشی نا نوٹس ہلے۔
ماما قدیر بلوچ پارے کہ تیوہ بلوچستان ئٹ ہڑدے بلوچ نیاڑی تا زوراکی نا بیگواہی ریاستی حکومتی عمل اس لگیک ہرا بلوچستان ئٹ مروکا نسل کشی ٹی پین ترندی ہتنگ ءِ و اگہ داڑا جہانی ادارہ آک نوٹس ہلتور و پاکستان نا دو ءِ توتوس تو بلوچستان ئٹ بندغی نا اندنو بےشرفی مرو ہرا نا بارو ئٹ جہان گمان ہم کننگ کپک۔
