گدان آ اوار نا درشانی کن ملیر کراچی آن سیاسی و چاگڑدی باسک داد محمّد بلوچ سراج بلوچ تون اوار ایلو نرینہ و نیوڑیک بسر۔
وی بی ایم پی نا وائس چیئرمین ماما قدیر بلوچ پارے کہ ریاستی کارندہ آتا بشخ جوڑ مروکا بلوچ نا غلامی ءِ سوگو کننگ و ریاست ءِ مستحکم تخنگ نا مسخت آ عمل کننگ ءُ اوفتے بلوچ نا ڈکھ دڑد ئنا غم اف۔ دا لمّہ ایڑ، باوہ و ایلم تتون ہچو کاریم اف ہرافتا بندغ آتے ریياستی کارندہ آک بےدادی کریسہ کسفینو او بیرہ تینا بھلا تا پاننگ آ و تینا تنخوا تے حلال کننگ کن کننگو ولے بلوچ آک بائدے دا چم ئٹی بفس انتئے کہ 72 سال آن نن اوفتا جوان و خراب انگا حرکت آتیان گدرینگنگ اُن دو ہچ بتنے۔ ریاستی کارندہ آک اُرا تیٹ پیہیسہ چادر و چار دیواری نا شرف ءِ پامال کننگ و بلوچ غیرت ءِ داغدار کریسہ بلوچ آتے زوراکی ئٹ بیگواہ کننگو تو مگہ وا ہم نا دا چکاس نا بشخ جوڑ مرین ؟ ننے شہید آتا مشن ءِ پورو کروئی ءِ اندا ٹی بلوچ نا رکھ و زیست ءِ۔
ماما قدیر بلوچ پارے کہ نن ہچ خواہپنہ نن شہید آتا وارث اُن۔ ہرا تینا بندغ تا آجوئی و سرزمین کن ساہ تسر۔ نُم اوفتے کمک کپبو و دادے چکاسبو ہرا خوشالی نا کسر ءِ دا دلالی و ڈیتھ اسکواڈ تیٹ ہننگ شہید آتا جون تیان گدرینگ و بلوچ قوم نا مرک ئنا پروانہ آ ستخط نا بریبر مرو و دا عمل شہید آتا دتر تون غداری ءِ ہرادے ہچو شعور تخوکو بندغ ئس کپرو۔ ریاستے کارندہ و ڈیتھ اسکواڈ نا بشخ جوڑ کروکا اسہ وار پدا ہمو شہید آتے یات کیر۔
