زورانسری ئٹ بیگواہ غا بندغ و شہید آتا بین برانز گِدان ئے 4983 دے پورو مس۔
اواری نا درشان ئے کروکا تیٹی کوہلو آن بجار مری، رحمت مری، دوستین مری و جتا آ فکر ئنا بندغ آک اوار اسُر۔
وائس فار بلوچ مسنگ پرسنز نا کماش ماما قدیر بلوچ درشان ئس شینک کریسہ پارے کہ بلوچستان ئٹی ارا سیاسی صورتحال ئے، دانا خبر کس ئے اف، بیگواہی تا دا بِنا 1948 آن ہلیس اینو اسکان برجاء ئے، ولے دا ٹی تیزی 2000 آن شروع مس داسکان ہم برجاء ئے۔
او پارے کہ دانا غور ئٹ جائزہ کننگ مرے، انٹرنیشنل انصاف نا ادارہ آک داڑا غور کیر، تو دا اسِہ بھلو المیہ ئسے، دون کہ بلوچ آتا بیگواہی، دا وخت آ ہزار آ بلوچ آک بیگواہ او، ارافتے غیرقانودی ڈول ئٹ پاکستانی لشکر بیگواہ کرینے۔
بلوچستان نا کُنڈ کُنڈ آن بلوچ ورناک بیگواہ مننگو، بلوچستان ئٹی دونو اُرا ئس اف کہ ہراڑان کس ئس بیگواہ اف۔
ماما قدیر بلوچ پارے کہ پاکستان نا دا پوسکنا ڈاکٹرائن ارا بلوچ آتیا کارمرز مننگے، دا پرامن ءَ جدوجہد ئے مذہبی ءُ قبائلی طاغت ئٹ ختم کننگ نا کوشست کننگے۔
شست ہزار آن گیش بلوچ ورناتے زورانسری ئٹ بیگواہ کننگ مسونے، ولے داسکان اوفتا ہچو احوال ئس افک، دا وڈ انگا انسانی حق آتے لغت مال کننگ نا برخلاف ننے مُچ مظلوم آ راج آتے توار بڑز کروئی ئے۔
او پارے کہ بلوچستان ئٹی حکومت آتے مٹ کننگ و پوسکنو حکومت ہتنگ ننا برجاء ءَ جہد ئے سلفنگ کپک۔
