زوراکی ئٹ بیگواہ مروکا بلوچ و شہید آتا بین برانز گدان ءِ 5049 دے پورو مس، اواری نا درشانی کن سیاسی و چاگڑدی باسک ثناء بلوچ، صلاح بلوچ، ٹکری نیک احمد بلوچ و ایلو کیمپ آ بسر۔
وی بی ایم پی نا وائس چیئرمین ماما قدیر بلوچ پارے کہ بلوچستان قدرتی وسائل آتا مڈی تیان سیر ءُ علاقہ سے وا ہم دا ڈیہہ ئٹی آباتی تیا بمباری جشوک جون و زوراکی نا بیگواہی تا بے سلوکو لڑ ئس برجاء ءِ۔ عدالت و پریس کلب آتا مونا زوراکی ئٹ بیگواہ مروک بندغ تا تولوکا خاؤت آتا فریاد تالان ءِ ہراڑے بےبندغی کاروائیک تینٹ اسہ مثیل ئس جوڑ مسنو۔ ولے داڑا اوسوزناک بندغی حق آتا ادارہ آتا کڑد و میڈیا نا روشت ءِ کہ دا تیبہ حالیت ءِ دا حد اسکان خراب کننگ نا سوب جوڑ مسنو۔
ماما قدیر پارے کہ وی بی ایم پی دا بےبندغی حالیت و دا نا گواچی مروک بیوس آ مخلوق نا توار ءِ جہان نا مونا ہتنگ نا عزم تخانے۔ ریاستی زوراکی نا دا دور ئٹ ہراڑے حوالکاری نا اصول ءِ بے منکن جوڑیسہ ظلم و زوراکی نا کسر ءِ توروکا توار تے چُپ کننگ نا ہر منکن کوشست مننگ ئٹی ءِ۔ ننا تنظیم زوراکی نا بیگواہی و بے قانودی کُشت و خون مروکا بلوچ آتا خاؤت و آپریشن و بمباری نا گواچی مروکا بے اُرا و بے آسرہ غا بلوچ آتا توار جوڑ مننگ نا ذمہ واری ءِ پورو کننگ ئٹی ءِ۔ دا مسخت نا رد ئٹ وی بی ایم پی بلوچستان ئٹی ریاستی ادارہ آتا دو آن مروک بندغی حق آتا لتاڑ، خاص وڑ ئٹ فوجی آپریشن، زوراکی نا بیگواہی جشوک جون تا تدینی تیا رپورٹ جوڑ کننگ ءِ ہرا ودیک گامگیج کن بنداوی معلومداری تننگ ءُ۔
دا بابت ئٹ وی بی ایم پی نا کنڈ آن بلوچستان ٹی ریاستی دہشتگردی و ریاستی ادارہ تا دو آن بندغی حق آتا لتاڑ نا تدینی تیا او پارے کہ ڈھکوک ادارہ و ریاستی لشکر نا مخ تفی ٹی ڈیتھ اسکواڈ نا کنڈ آن بازار و السی ہند و بس آتیٹ بندغ آتے، خاص وڑ ئٹ ورنا و خوانندہ تے دھڑفیسہ زوراکی ئٹ بیگواہ کننگک، اوفتے ٹارسیل آتیٹ بند کریسہ اوفتیا بیدادی کننگک۔
