زوراکی ئٹ بیگواہ مروکا بلوچ و شہید آتا بین برانز گدان ءِ 5046 دے پورَو مس۔ اواری نا درشانی کن سیاسی باسک میر محمد بلوچ، محمد حسن بلوچ، محمدیوسف بلوچ تون اوار ایلو نرینہ نیاڑیک کیمپ آ بسُر۔
وائس فار بلوچ مسنگ پرسنز وی بی ایم پی نا وائس چیئرمین ماما قدیر بلوچ پارے کہ بلوچستان ئٹ خاخر و دتر نا ندارہ آک، سیاسی سروک، باسک، ورنا و لس شاری تا وہوکا دتر حکمران تا برخلاف خار و بدلہ تا خاخر ءِ پین بھلن کننگ ءِ۔ خاص وڑ ئٹ بلوچ باسک آتا زوراکی نا بیگواہی آن گڈ اوفتا جشوک جون تا دروشم ئٹ آجوئی نا برخلاف خار بلوچ چاگڑد ئٹی سیاسی باسک آتا ترند رد عمل ئٹی خننگک۔ ولے خَنوکا تا پاننگ ءِ کہ بلوچ قوم ئنا دا رد عمل آن کالخواک ہچو سبخ ہیل کننگ افس و بلوچ ورنا تا زوراکی نا بیگواہی آن گڈ اوفتے بے بندغی بےدادی تیان گڈ خون کننگ نا تدینی تیٹ ترندی بسنے۔
ماما قدیر بلوچ پارے کہ بھاز بندغ آتا پاننگ ءِ کہ بلوچ آتا بے گور وکفن رسینگوکا جشوک جونک بلوچ تپہ آتا خلیس دا بیان آتے پک کیک کہ بلوچ چاگڑد ئٹی تالان مروکا مزاحمت ءِ توننگ ئٹی بے سہب مننگ آن گڈ بلوچ نسل کشی نا باقاعدہ بناء کننگانے و اسہ وار پدا قطبی بنگال نا تاریخ نا تدینیک بلوچستان ئٹی مونا بننگ ئٹی ءُ و ہرا وڑ بنگالی تے لس خون کننگا ہمو وڑ داڑے ہم کُشت و خون برجاء ءِ۔ ولے دا فکر و عمل ہراڑے قطبی پاکستان ءِ بنگلہ دیش جوڑ کرے ہموڑے بلوچستان ئٹی ہم اندا وڑ ئنا بھرم تا خلیس ارے۔
او ودیک پارے کہ اندا تپہ آتا رد ئٹ بلوچ نسل کشی کون آ عمل آک بلوچ قوم و حکمران آتا نیام ئٹ دتر نا ہمو کڑُمب آ قطار و بُڑز آ دیوال جوڑ کننگ ءِ ہرافتے ایسر کننگ منکن اف و حکمران تے بدنامی و بے سہبی آن بیدس ہچ دو بروف ہمر کہ او بلوچ موہکش و باسک آتا دتر ئٹ ہولی گوازی کننگ ءُ۔
