جنیوا: بلوچ نیشنل موومنٹ نا چیئرمین ڈاکٹر نسیم بلوچ پارے کہ چین و پاکستان نا اتحاد مغرب نا مفاداتیکِن خطرہ سے او اموڑے بلوچ مخلوق نا بنیاتی و بندغی حق آتے آ مون پہ مون حملہ کننگے۔
دا ہیت آتے او اقوام متحدہ نا بندغی حق آتا کونسل نا 52 می نشست نا موقع آ اَسے شِیف اُو تقریب ئسے آن خطاب کریسا پارے۔ دا کانفرنس ئے اقوام متحدہ نا ادارہ آتون اَسے جاگہ کاریم کروکا غیر سرکاری تنظیم (این جی اوز) ضمیر نا آجوئی کِن انجمن آتون و بندغاتون اواری کِن -کیپ (Coordination des Associations et des Particuliers pour la Liberté de Conscience )کریسُس۔
او تینا خطاب ئٹی پارے ارا وختا پاکستان دا خطہ ئے قوضہ کرینے، بلوچستان نا مخلوق عام زندگی تدیفنگ کن جُہد کننگ ئے۔ پاکستان نا دا جبر آن ننا معاش ، ثقافت ، روایات تون اوار زبان ئے ہم خطرہ ٹی شاغانے ۔بلوچستان نا گیشتِر مخلوق مَش تیٹی رھینگِک تینا ارغ و دیر ئکِن ہیٹ و میل یعنی مال داری کیرہ۔ پوجی آپریشن تَان اوفتا دیر و ارغ ہم مشکل تیٹی تمانے او تینا مَش و خلق آتے آن لَڈ و بار کننگ آ مجبور مسُنو۔
چیئرمین ڈاکٹر نسیم بلوچ چین و پاکستان نا نام نہاد اقتصادی کوریڈور نا زی آ تنقید کریسا پارے کہ داڑن مُست پاکستان بلوچستان ئٹی تنہا بندغی حق آتا خلاف ورزی ئے کریسا اسَّکہ ولے داسا چین ہم دا دے زیات کننگ آ زور شاغِنگے اَسہ نام نہاد و ترقیاتی اسکیم ئس زی آ شاغنگ کن گٹھ جوڑ کرینو ، دا ون بیلٹ ون روڈ منصوبہ، چین پاکستان اقتصادی راہداری (سی پیک) نا بشخ ئسے۔ دا منصوبہ ئے زبردستی جوڑ کننگ آن ہزار آتا کچ ہندی مخلوق ہمپ ءُ لڈ کننگے و اوفتے جبر ئٹ بیگواہ کننگانے۔ سی پیک نا مون ئے ساف کننگ کن بھاز آ خلق آتے ہُشنگانے و چین ئنا مفاد آتا رکھنگ کِن بھاز پوجی کیمپ و چوکی جوڑ کننگانے، حقیقت ئٹی دا پوجیک بندغی حق آتا درندگی ئٹ خلاف ورزی کننگ نا ذمہ وار ءُ ۔
او بلوچستان ئٹی بندغی حق آتا پُوسکنا حالیت ئے پاش کریسا پارے کہ فروری 2023 ئٹی جبر ئٹ بیگواہ مرکو 39 کیس مونا بسُنو ہرافتیٹی اِرا زالبول رشیدہ بلوچ و ماھل بلوچ ھم اوار ءُ ۔ ماھل بلوچ ئے وختی جبر ئٹ بیگواہ کننگا و پدا اودے سلاہ بند تنظیم آتا باسک جوڑنگ نا دروغ ئنا الزام ئس خلنگا۔ اودے ھاونا تاتہ ئے و اِرا چُنا تون اوار بیگواہ کننگا، اوفتے 24 گھنٹہ آن زیات بیگواہ کننگا, ایلوفتے پدا یلہ کرے ولے ماھل بلوچ جبر ئٹ بیگواہ اسَکہ۔
بلوچ مخلوق نا باز اِنگا کُوکار و احتجاج و مظاہرہ تان پد اَسے ہفتہ سے آن پد عدالت آ ہتنگا۔
ہندُن رشیدہ زہری ئے اونا ارِغ و چُنا تیتون اوار بیگواہ کننگا۔ ہندن کہ رشیدہ ئے 11 دے تشدد کننگ آن پد یلہ کننگا ولے اونا ارِغ رحیم زہری داسکان بیگواہ ئے۔ اَسے پین اُست ئے ہُسون کروکو واقعہ ئس ضلع آواران نا عیلاقہ گیشکور ئٹی مَس۔ دا دادبخش مسکان نا سفاک آ کھسفنگ ئے۔ اودے اَسہ پوجی کیمپ ئسے آ بٹنگِک پدا اوڑا تشدد کننگک، یلہ مننگ آن پد ٹپ آتے سگنگ کپپک ءُ دا دنیا اے اِلّک۔
او پاکستان ئے دا خطہ آن بیدس پورو دنیا کن اَسہ خطرہ ئس پائک۔ او پائک پاکستان بلوچستان تون اوار پورو خطہ نا امن و سلامتی کن سنگین ءُ خطرہ ئسے۔ دا ضروری ئے اقوام متحدہ و ایلو عالمی طاقت آک کھل دنیا ٹی بے حفاظت آ بندغ آتا جان تے بے وجہ زیاں مننگ نا سوَب ئے پٹیر و دادے تورِر دانا مقابلہ ئے کننگ کِن اَسہ بھلو منصوبہ ئس ٹہیفیر ۔دا خطہ ہمو وخت اسکان سلامتی و مضبوطی نا کنڈا ہنپک ارا وخت اِسکان پاکستان جنونیت و دہشتگردی نا پرورش و پلّو نا ہلنگ ئے الیپک۔ پاکستان نا مذہبی عسکریت پسند آک پراکسی جوڑ کننگ و اوفتا استعمال کننگ نا پالیسی تا وجہ آن باز بے لغام انگا جنگجوک و اسلامی انتہا پسند آک با اختیار مسُنو۔ ہمو اینو جہان نا سلامتی کن خطرہ جوڑ مسُنو۔ پاکستان نا تربیت یافتہ انگا انتہا پسند آک یورپ و مشرق وسطی آن ہلیس ہندوستان اسکان دہشت گردی و حملہ کننگ ءُ ۔ مہذب دنیا اے خطرناک آ مذہبی جنونیت نا خلاف جنگ کروکا قوم آتون و مقامی آ تحریک آتا کمک ئے کروی ئے۔
بلوچ، سندھی، و پشتون نا وڑ انگا قوم آک مُتکُن اِنگا سیکولر انگا تہذیب آتے مذہبی انتہا پسند آتے بچِفنگ کن جہد کننگ ئٹی ءُ ۔ عالمی برادری ئے زوت ئس دا مسلہ نا سوج ئے کروی ئے و دا خطہ ٹی آجوئی کن جنگ کروکا تا کوشست آتے منوئی ئے و افتا کمک ئے کروی ئے۔
ڈاکٹر نسیم بلوچ پارے کہ بلوچ تینا لبرل و سیکولر انگا روایات آتا بچفنگ کن پاکستان نا نظریاتی و اسلامی پوج و اونا پراکسی تا خلاف جہد کننگ ئٹی ئے۔داسا وخت بسونے عالمی برادری منّے کہ بلوچستان نا مسلہ علاقائی او مسلہ ئس اَف بلکہ دا جہانی مسلہ ئسے۔ دنیا ئے چین ئنا قوضہ و زیات مروکا اسلامی انتہا پسندی نا خلاف آجوئی نا جنگ ئٹی بلوچ مخلوق تون کمک کروی ئے ۔ دا ہیت ساف ئے بلوچستان ئٹی بندغی حق آتا سنگین آ خلاف ورزی آن بیدس یورپ پاکستان تون تینا اقتصادی تعلق و معاہدہ تے تورینے۔ اَسہ جہانی اقتصادی و سیاسی او طاقت ئس چاننگ ئٹ یورپ نا دا ذمہ واری ئے کہ او پاکستان ئے بلوچستان ئٹی اونا کروکا عمل آتیکن جوابدہ کے۔ترجیحات نا عمومی اسکیم(جی پی ایس پلس) معاہدہ پاکستان آن بندغی حق آتا قانون و اودے برجا تِخنگ کن و اونا احترام کننگ نا پائک۔ نن یورپ ئے پاننگ خوانہ کہ او آئندہ اجلاس ئٹی بلوچستان نا سنگین انگا حالیت ئے مونا ہتے و پاکستان ئے اونا عمل تا زی آ جوابدہی کن سخت ءُ گام ئس ہرفے۔ بلوچستان نا بندغ آتا بنیاتی حق آتا و اوفتا قومی آجوئی ئے ہلنگ و اوفتا مدت و کمک کن مونا برے۔
