اے آجوئی نے کوکار خلینہ، نے است ئنا مہر ئٹ پانہ، نن دا مون انگا نن پارہ غا توار بڑزا کرینن۔ ہندا سوب آن نن یخ و ہورہ آتے جان آ سہانن۔ نن ڈکھ و ویل آتے است ئٹ ہندی کرینن۔ نن جیل و زندان تیٹی نے کن ظُلم سہانن۔۔۔۔۔بے تغی ءِ نا پن آ کرینن، سہب ئنا استار اسکان نا کسر آ ہُرانن۔ اسہ وار پدا کوکار خلینہ کہ برک نے کن بھازاک گمنام مسر۔بھازاک شہید مسر بھازا لمہ غاک تینا اولاد آتا سیخا ءِ گم کریر، بھازا ایڑ تا لج و میار نے کن گوہنگا ظلم ئنا نسخل ئٹی نسنگار نن سرپند مرینہ کہ ننا بُن پیرہ باوہ ایلم تا پچ آک نے کن دتر آن چڑوکو۔ نن دا ڈیہہ ءِ دتر ئٹ بے شولِفینن، ہندا مش تیٹی ننا پیرہ، بن پیرہ غاتا ہڈ آک ہندی ءُ۔ اسہ بھلو قبرستان ئس جوڑ کرینو ننا است آک بور بور ءُ، نن غلامی نا زنجیر ءِ داسکان گرینگ ٹی اُن۔
ولے۔!! کڑیک تہ بھاز نزور ءُ ہرافتے ٹی دا ڈیہہ ئنا ورنا تے بندی کریسر۔نن خننگ ئٹی اُن کہ ہمو ندریک پوک مفرور۔ چلتن نا ماس آن، بولان نا نیام آن، آماچ نا خڑک آن، ناگاؤ نا پلو آن نے زو ئس بخیرٹ کرون۔نے دروت تننگ کن کوہ مہردار نا ٹل آ ورنا تا خنک خلوک ہروک ءُ۔نے خمب ئٹی خلنگ کن میری قلات بھاز زہیری ءِ، نا سیل ئکن کوہلو، کاہان، سوئی و ڈیرہ بگٹی بھاز اشتافی ءِ۔ نے سجدہ کرور نا نت تیان بُک الور کوہنگ قلات شہید لونگ خان شہید علی دوست نا ڈیہہ نے کن گوادر نا دریاب ہروک ءِ نے کن گٹ و تلار آک کوہسار آتا چشمہ غاک ہروکو نے کن بلوچ وطن نا سہدار آتا ہم خنک خلوکو۔کہ برک ننا مونجائی ءِ کم کرک نے کن بلوچ سرمچار آتا ہنکین آک چک خلوکو برک۔اے " آجوئی" برک نی زو اس برک۔۔۔!!
یاتی دا نوشت اولیکو وار 2/8/2010 ٹی توار اخبار نا براہوئی بشخ ئٹ شینک مسوسس ہرادے نن نم خوانوک آ تیکن زرمبش آ شینک کننگ اُن۔
