بلوچ نیشنل موومنٹ نا مُسکوہی چئیرمین خلیل بلوچ تینا خلاف بلوچ نیشنلسٹ آرمی نا جارکش مُرید بلوچ نا نیمہ آن خلکوکا دوبہ آتے رد کرسہ پارے کہ بی این اے نا دوبہ آک بھاز چُنائی ءُ ہرا آئی ایس آئی نا پروپیگنڈہ و بلوچ دشمن منصوبہ آتے مونی دننگ نا کُمکار ءُ ۔ گلزار امام دشمن نا چالاخی و تینا نادانی آن دزگیر مسُنے اونا دزگیری نا دوبہ ءِ ایلو آجوئی خواہوک تنظیم آتا خلنگ دشمن نا ایجنڈہ ءِ مونی دننگ آن بیدس ہچس اف۔
چیئرمین خلیل بلوچ پارے کہ گلزار امام آجوئی خواہوک ئس اسک ولے ننا تنظیمی رد ئٹ ہچو رابطہ ئس متنے۔ بی این ایم و اوفتا جہد ئنا طریقہ ٹی زمین آسمان نا فرق ارے و نہ ای اودے سفارت کاری کن رابطہ کرینُٹ ۔ سفارت کاری کن بلوچ نیشنل موومنٹ نا بھلو کھیپ ئس ساڑی ءِ ہرا تینا ذمہ واری تے پورو کننگ ءُ۔
او مونی پارے کہ گلزار امام نا دزگیری نا ہیت ءِ دا اوفتا تنظیم نا تہنا ہیت ئسے ، دا ہیت ءِ بیرہ اونا تنظیم نا بندغ آک سرپند ءُ امر آئی ایس آئی اودے تینا جال ئٹی پھسیفے و پین ڈیہہ ئسْیا بٹنگیفسا دزگیر کرے۔ سرفراز بنگلزئی مرید بلوچ گلزار امام نا ڈپٹی کمانڈر و جارکش ءِ ، دا امر ممکن ءِ کہ گلزار اوفتے پاتو و ایلو تنظیم آتا رہشون آتون مشورہ کرے؟ اخس کنے خبر ءِ گلزار امام تینا سفر و سفر نا مسخت نا بابت آ ہچ ایلو تنظیم ئسیتون مشورہ کتنے۔ اونا سفر و سفارت کاری نا بابت آ اونا تنظیم نا ذمہ وار تے خبر مریک ہرافتیٹی مرید بلوچ تینٹ اوار ءِ ۔ اگہ گلزار امام مچٹ بھروسہ نا مظاہرہ کریسہ ایلو آجوئی خواہوک اتحادی سنگت آتون مشورہ کروس ہچ وخت دا وڑ متوکہ ولے افسوس کہ اوفک کُل تحریکی،تنظیمی ذمہ واری تے و حساسیت ءِ حساب کتو و ہندنو کسر ئسیا ہنا ہرانا ایسری اونا دزگیری مس۔
چیئرمین خلیل بلوچ مونی پارے کہ اسہ کلپ ئس شینک کننگانے ہراٹی گلزار کنا و کنا وخت ئنا وائس چیئرمین ڈاکٹر خدابخش نا زی آ دوبہ خلنگ ءِ کہ نن اونا حوال آتے جوڑ کرینُن۔ دا ریکارڈ آتے شینک کننگ و کنا زی آ دوبہ خلنگ بی این اے نا داسا نا لیڈرشپ نا چُنک سوچی و نادانی ءِ نشان تیک۔ پولیس نا دزگیری ٹی ہلوکا بْیان تا زی آ جہان نا مہذہب انگا ادارہ آک بھروسہ کپسہ و نا پاکستان نا کرپٹ انگا عدالت آک دانا زی آ بھروسہ کیرہ کہ اود ثبوت سمجھنگ مریر۔ ولے حیرانی نا ہیت ئسے کہ آئی ایس آئی نا وڑ انگا حیوان آ ادارہ نا دزگیری ٹی ہلوکا بْیان نا زی آ سرفراز بنگلزئی ءِ بھروسہ ءِ ہرا فون کال ءِ آجوئی خواہوک آتا برخلاف اسہ ثبوت ئسینا حیثیت ئٹ شینک کرینے۔ پوہ مننگ و سوچنگ نا ہیت دادے کہ آئی ایس آئی گلزار امام نا زی آ داخس مہربان ءِ کہ اونا دزگیری آن پد اودے آزاد ءُ ماحول ئسیٹی تولنگ نا اجازت رسینگک بلکہ اونا سنگت آتون حال حوال و ہیت کننگ نا سہولت ہم تننگ مریک دانا زی آ سوچنگ بھاز المی ءِ ۔
اوفک آخر ئٹ پاریر کہ بی این اے نا مُست درشان ئس بسَس کہ گلزار امام نا دزگیری ءِ اسہ سال ئس پورو ءِ پاکستانی آئی ایس آئی گلزار امامءِ برین واش کریسہ اونا ذریعہ دروغ ئنا پروپگنڈہ مہم ئس بنا کرو۔ ولے بی این اے آئی ایس آئی نا دزگیری ٹی بند برین واشنگ و منصوبہ بندی ئٹ کروکا گلزار امام نا ہیت آتے آجوئی خواہوک آتا بر خلاف کارمرز کننگ ءِ ۔ تحقیقات دا ہیت ئنا مرے کہ اسہ سال ئسْیان آئی ایس آئی نا قید ئٹی بند گلزار امام امر آجوئی خواہوک آتون رابطہ کننگ ءِ و اودے آجوئی خواہوک آتا بر خلاف کننگ ءِ نن پوہ مرینہ بی این اے نا لیڈرشپ تینا چُنک سوچی آن آئی ایس آئی نا ایجنڈہ ءِ مونی دننگ ءِ ہرانا ایسری بھاز خراب مرو۔
