بلوچستان نا ضلع خضدار، نوشکی و مستونگ آن پاکستانی لشکر اِرا ایلم تون اوار ہفت بندغ دزگیر کننگ آن گڈ بے ڈس ءُ جاگہ سے آ درینے۔
ایلو نیمہ غان زوراگی ئٹ بیگواہ مروکا اِرا بندغ آجو مریسہ تینا اُرا تا سر مسنو۔
بیگواہ مروکا تا چاہنداری اسامہ ولد حاجی واحد مینگل، نصیب اللہ ولد حاجی واحد مینگل نوشکی قاضی آباد نا ہندی، نادر حسین ولد محمد خان مشکے گجر نا ہندی، محمد آصف ولد مراد، جاوید ولد عبداللہ خضدار نا ہندی، فہاد ولد محمد وارث و اسلم کرد نا پن ئٹ مسنے۔
بیگواہ مروکا تیان اِرا ایلم اسامہ و نصیب اللہ ءِ پاکستان لشکر تدوکا دے تیٹ نوشکی نا علاقہ قاضی آباد آن دزگیر کریسہ بیگواہ کرینے۔ نصیب اللہ ملتان یونیورسٹی پنجاب آن خواننگ ءِ ایسر کریسہ برجاء دے تیٹ نوشکی ٹی رہینگنگ ئس۔
ہندن نادر حسین و محمد آصف ءِ تدوکا دے خضدار نا علاقہ کوشک آن اوفتا سیال آتا اُرا آن دزگیری آن گڈ بے ڈس ءُ جاگہ سے آ دننگانے۔
حوال تروکا تا پاننگ ءِ کہ نادر حسین اسہ خوانندہ سے ہرا مشکے نا ہندی سے و لشکری آپریشن آتا سوب آن تینا باوہ پیرہ ئی عیلاقہ آن ہمپیسہ حب چوکی ٹی زند کننگ آ بیوس اس۔ او تدوکا دے تیٹ خضدار ئٹی تینا ایڑ ئنا اُراغا بسس ہراکان اودے بیگواہ کننگا۔
ہندن خضدار نا ہند جعفر آباد آن پاکستانی لشکر جاوید ولد عبداللہ و فہاد ولد محمد وارث ءِ دزگیر کریسہ بے ڈس ءُ جاگہ سے آ درینے۔ خضدار آن ودیک پین چار بندغ نا زوراکی ئٹ بیگواہ مننگ نا حوال رسینگانے، گیشتر حوال تے کن ننا سر سوج برجاء ءِ۔
داکان بیدس تدوکا دے تیٹ مستونگ نا عیلاقہ دشت آن اسلم کرد پنی ءُ بندغ ئسے پاکستانی لشکر زوراکی ئٹ بیگواہ کرینے۔ پن کروک بندغ نا بُنماسی تعلقداری مچھ آنے و او کُھر خوافیسہ تینا گزران ءِ کریکہ۔
بولان آن رسینگوکا حوال آتا رد ئٹ پاکستانی لشکر نا دو آن زوراکی ئٹ بیگواہ مروکا ضیعب العمر حمزہ ولد شکاری و جوسل ولد خیرو آجو مریسہ اُراغا سر مسنو۔
