بلوچ قومی رہشون استاد واحد کمبر بلوچ تینا شنگ کروکو درشان ئسیٹی پارے کہ بلوچستان نا ایلو عیلاقہ آتا وڑ ئٹ ڈیرہ بگٹی ٹی فوجی لشکر کشی زور ءُ شور ئٹ برجاہ ءِ اوڑے بندغ آتے دزگیر کرِسہ زورانسری ئٹ بیگواہ کننگ ءُ ۔
او پارے کہ بلوچستان ئٹی گدرینگوکا 75 سال آن ریاستی ظلم برجاہ ءِ ۔ بلوچ سر زمین ءِ پاکستان جبر ئٹ قوضہ کرینے و ہزار آتا کچ ئٹ بندغ آک زورانسری ئٹ بیگوائی نا گواچی مسُنو ۔
استاد واحد کمبر بلوچ پارے کہ قوضہ گیر آ ریاست بلوچستان نا کُنڈ کُنڈ ئٹی ظلم ءِ تیز کرینے ، پاکستانی لشکر مون پہ مون بلوچ نا نسل کُشی ءِ کننگ ءِ ۔ سیاسی کارکن ، خوانندہ ، بلوچ زالبول و بلوچ جہد کار آتا خاوت آتے ظلم ئنا نشانہ کرینے ۔
او پارے کہ دا ظلم ئنا ایسر کننگ کہ اگہ بلوچ رہشون آک یکجاہ متوس و حکمت عملی ئس جوڑ کتوس تو تاریخ ھچ بر ننے بشخوف۔
او مستی پارے کہ بلوچ آتا پاکستان نا نیمہ آن برجاہ ظلم آ دنیا تینا خن تے تفینے ۔ ولے ضرورت ہندا ہیت ئنا ءِ کہ بلوچ سربر آک آزاتی نا دوئی کننگ و ریاستی ظلم ئنا برخلاف یکجاہ مریر ۔
بلوچ رہشون استاد واحد کمبر آخر ئٹ اقوام متحدہ آن خواست کرے کہ او ڈیرہ بگٹی ٹی برجاہ پاکستانی لشکر کشی ءِ بند کننگ نا کردار ءِ ادا کے ، تیبہ بلوچستان ءِ نسل کُشی و بلوچ قوم ءِ ریاستی جبر آن رکّھے۔
