بلوچستان نا ضلع خضدار، تحصیل وڈھ ئٹی لسبیلہ یونیورسٹی وڈھ کیمپس نا خوانندہ آک سول سوسائٹی و سیاسی باسک آتون اوار کیمپس ءِ ماڑی ئس تننگ و جتا یونیورسٹی نا درجہ تریسہ سردار عطاء اللہ مینگل نا پن آ کننگ تون اوار ایلو ویل آتا ایسری کن برانز کریر۔
برانزی ریلی یونیورسٹی کراس آن بناء مس و وڈھ پریس کلب نا مونا سر مریسہ ہموڑے تینا برانز ءِ برجاء تخا۔ برانز ئٹی سول سوسائٹی ،تاجر برادری، یونیورسٹی نا لیکچرر آتون اوار بندغ آک بھلو کچ اسیٹ اوڑدئی کریر۔
اوار مروکا تتون برانزیک تران کریسہ پاریر کہ وڈھ کیمپس ءِ ہفت سال پورو مننگ ءِ، ولے دادے ہر حوالہ ئٹ نظر انداز کننگانے۔ نصیرآباد یونیورسٹی نا قرارداد و خاران کیمپس تون اوار وڈھ کیمپس ءِ ہم یونیورسٹی نا درجہ تننگ کن قرارداد منظور کننگا واہم لسبیلہ یونیورسٹی وڈھ کیمپس ءِ نظرانداز کننگ اسہ تعلیم دشمنی سے۔
او پاریر کہ خوانندہ آتیکن، خاص وڑ ئٹ زالبول خوانندہ آتیکن دمدستی ہاسٹل نا ماڑی ئس جوڑ کننگ مرے۔ داکان بیدس پوریا تیٹ ودکی و اسٹاف نا نیستی تون اوار غٹ ویل آتا دمدستی نوٹس ہلنگ مرے و ڈیوٹی نا بابت ئٹ 8 ساعت نا وخت تننگ مرے، لوئر اسٹاف ءِ مستقل کننگ مرے۔ اندن وائس چانسلر لوامز نا وڈھ کیمپس تون جد مادری آ روشت نا سخت نوٹس ہلنگ مرے۔
