وڈھ: خضدار نا ہند وڈھ ئٹی پاکستانی لشکر نا لشکر کشی نا برخلاف ہندی بندغاک برانز کریسہ کسرتے بند کرینو۔ چاگڑدی میڈیا ٹی شینک مروکا ویڈیو تیٹی خننگ مریک کہ پاکستانی لشکر ہندی بندغ آتا زی آ سمکاری کننگ ءِ ۔
برانز کروکا بندغ آتا پاننگ ءِ کہ پاکستانی لشکر مردم شماری کن بسُنے و داسہ بندغ آتوں زوراخی کننگ ءِ ۔ اُراتا پٹنگ تون اوار بندغ آتے لٹ و کٹ کننگ ءِ ۔
اوفتا پاننگ ءِ کہ داڑے پولیس و لیویز ساڑی ءُ اوفتے رائی کننگ آن بیدس ایف سی ہم بسُنے واُرا تے پٹنگ ءِ ۔ ایلو بندغ آتا اواری ئٹ چُنا و زالبول آتے ہم لٹ ءُ کٹ کننگ ءِ ۔
برانزی تہ پاننگ ءِ کہ اوفک دا وڑ ئنا ہچو زوراخی تے منیپرور، اگہ اوفتے پین شک ئس ارے گڑا ہندی لشکر ءِ رائی کیر داڑے اُرا تے پٹنگ اوفتا کاریم ءِ ، ایف سی انتئے تینا دو ءِ اوار کننگ ءِ ۔
اوفتہ پاننگ ءِ کہ ننا خواست ہندادے کہ داکان ایف سی پیشتمے و دا ہند ئنا اختیار ءِ پولیس ءُ لیویز نا دوٹی ایتے۔ ہرا وخت اسکان ایف سی نا زوراخی تے توننگ متنے ننا برانز آک برجاء مرور۔
یاتی مرے کہ بلوچستان نا جتا جتا انگا ہند آتا زوراک پاکستانی لشکر نا زوراکیک برجاء ءُ ، ہر جاگہ آ آپریشن و چھاپہ نا پن ئٹ بندغ آتے لٹ ءُ کٹ کرسہ زور ئٹ بیگواہ کننگ ءِ ۔
