وائس فار بلوچ مسنگ پرسسنز نا کماش ماما قدیر بلوچ ٹویٹر ءَ تینا ٹویٹ آتیٹی پارے کہ ظہیر بلوچ نا آجوئی نا بابت ئٹ عوام ئے گمراہ ءُ وی بی ایم پی ئے متنازع کننگو۔
ماما قدیر بلوچ پارے کہ تدوکا سال ءَ ظہیر بلوچ نا خاہوت نن تون اھوال کرے کہ ظہیر بلوچ ئے دے آن کوئٹہ ائیرپورٹ کسر آن زورانسری ئٹ بیگواہ کننگا۔ نن اسِہ رضاکارو تنظیم ئسے اُن، ننا کاریم ہندادے کہ بیگواہ ءَ بندغ آتا خاہوت آتے کمک ئے، نن ہندا خاطر آن اوفتا کُمک ئے کرین۔
ظہیر بلوچ نا خاہوت تینا ایف آئی آر کریس ئس ءُ ہائی کورٹ ءَ سی پی فائل ہم کریسس۔ نن بیرہ اوفتیکن کاریم کرین ہندون کہ ایلو بیگواہ ءَ بندغ آتیکن کینہ۔ نن اونا کیس ئے بیگواہ ءَ بندغ آتا کمیشن نا ھوالہ ٹی کرین۔
زیارت واقعہ آن گُڈ اونا خاہوت میت نا جون ئے دُرست کریر او پاریر کہ دا بیگواہ ءَ ظہیر نا جونے۔ ای نہ ظہیر ئے خنانُٹ نہ ای اودے چاوہ ای بیرہ اونا عکس آتے خنانُٹ۔
داسہ ظہیر زندہ دوارہ بس، دا ننکن اسِہ خوشی نا ہیت ئسے ولے مخلوق آک وی بی ایم پی ءَ الزام خلنگو ءُ گمراہ کننگو۔ دا اسِہ بلو ناانصافی ئسے۔
ماما قدیر بلوچ پارے کہ داسہ ظہیر احمد زندہ بسونے۔ داسہ جوڈیشل کمیشن نا جج آک ہرفور کہ ظہیر ارانگ مسونے؟ اگہ ایران ئٹی مسونے تو ارا جرم ئٹ کیذ مسونے؟ اگہ اودے ایران ئٹی کیذ مسونے تو اونا جرم انت مسونے۔
