حکومت تون مروکا ہیت و گپ سرسہبی نا کُنڈا گام کننگ ءِ ۔ آمنہ بلوچ
کراچی ٹی بیگواہ مروک شوکت بلوچ اینو دو شمبے نا سُہب اتون آجو مس ۔ اودے مسہ تُو مہالو لیاری نا علاقہ میراں ناکہ اونا اُراغان بیگواہ کننگاسس ۔ شوکت بلوچ نا خاہوت نا رد ئٹ او سہب ئنا آجو مس و اُرا غا رسینگا ۔
بلوچ یکجہتی کمیٹی کراچی نا آرگنائزر آمنہ بلوچ شوکت بلوچ نا آجو مننگ آ خوشی نا درشان کریسہ پارے کہ اوفتا سندھ حکومت تون مروکا ہیت و گپ ئنا بھرم مونا بننگ ءِ۔ ہرا اسہ گچینو عمل ئسے۔ او اومیت کریسہ پارے کہ اوفتا پارہ غان سندھ حکومت ءِ تروکا فہرست ئٹی داسہ بیرہ اِرا بندغ آجو متنو ہرافتیٹی عبدالحمید زہری و عمران بلوچ اوار ءُ۔
عبدالحمید زہری ءِ کراچی نا علاقہ گلستان جوہر و عمران بلوچ ءِ کراچی نا علاقہ ماری پور آن اونا اُراغان بیگواہ کننگانے۔ او پارے کہ سندھ حکومت تون ہیت و گپ آن گڈ دا وخت اسکان اِرا بلوچ بیگواہ یلہ کننگانو۔ ہرافتیٹی نور بخش حبیب ءِ یکشمبے آ و شوکت بلوچ ءِ اینو یلہ کننگا۔
آمنہ بلوچ پارے کہ حکومت اتون مروکا ہیت و گپ سرسہبی نا کنڈا گام کننگ ءِ ہرا اسہ سیاسی ءُ عمل ئسے و دا عمل ءِ ہندن برجاء مروئی ءِ ۔
سما مرے کہ مون ئنا تُو جولائی ٹی سندھ حکومت و بلوچ یکجہتی کمیٹی کراچی نا نیام ئٹی کراچی آن بیگواہ مروک آ بندغ آتا یلہ کریفنگ نا رد ئٹ ہیت و گپ نا بناء مس۔ آمنہ بلوچ نا بھلنی ٹی بیگواہ مروکا بندغ آتا خاہوت آک سندھ ئنا وزیر میر شبیر بجارانی تون اوڑدئی کریر و دا اوڑدئی ٹی بیگواہ مروکا تا باروئٹ ہیت و گپ کننگا ۔
