بلوچستان نا ضلع خاران آن بیگواہ شاہ فہد بلوچ نا ایڑ نادیہ بلوچ کوئٹہ پریس کلب ٹی پریس کانفرنس کریسہ پارے کہ کنا 22 سالی ایلم شاہ فہد، ہرا حافظ القرآن ئسے ہرادے 16 مارچ 2022 آ ننا اُرا بابو محلہ خاران آن سی ٹی ڈی زوراکی ئٹ بیگواہ کرینے۔
او پارے کہ کنا ایلم ءِ آجو کننگ نا بدل آ ننے چرجوئی ئٹ تڑی تنگ ءُ و بیم ئنا گواچی کننگ ءُ کہ نُم ہیت کپبو و پولیس ایف آئی آر و بیگواہ غا بندغ تا کمیشن ءِ تروکا رپورٹ ٹی سی ٹی ڈی نا پن ءِ ہلپبو بلکہ نادرست آ بندغ نوشتہ کبو۔
نادیہ بلوچ پارے کہ کنا ایلم ءِ خن تیٹ خنوکا شاہدی تا مونا سی ٹی ڈی اُراغان زوراکی ئٹ بیگواہ کرے، او وخت آ سر و سوج نا نیمون ئٹ ننا ُاراغان موبائل فون، 70 ہزار کلدار و پین ارزشتی ءُ گڑا دریر، داکان مُست شاہ فہد ءِ کنا بھلا ایلم غلام فرید تون 26 اگست 2016 آ زوراکی ئٹ بیگواہ کننگاسس۔ شاہ فہد نا سن دا وخت آ بیرہ پانزدہ سال اس۔ اودے منَہ دے آن گڈ یلہ کننگا و بھلا ایلم ءِ مُسہ سال اسکان بیگواہ کننگ آن گڈ یلہ کننگا۔
او پارے کہ ننا خاہوت اسہ وڑ ریاستی جبر تون مون تننگ ءِ، ایف سی کرنل خاران کیمپ خواہفیسہ سی ٹی ڈی نا ساڑی گری ٹی تڑی تریسہ پائک کہ سی ٹی ڈی ءِ تینا ایلم نا زوراکی نا بیگواہی ٹی پن کپبو، ایلو کنڈ آن پولیس پائک کہ ایف آئی آر ٹی نادرست آ بندغ تا پن ءِ نوشتہ کرفبو۔
