بلوچستان نا پنی آ جہد کار شہید حمید بلوچ نا زائیفہ سنجی بلوچ پنچ شمبے نا دے سلطنت عمان نا شار بریمی ٹی بھلو وخت ئس ناجوڑ مننگ آن گڈ کذیت کرے اودے بریمی ٹی کھڈ کننگا۔
یاتی مرے کہ حمید بلوچ بلوچستان نا سیاسی و فکری تحریک تون تفوک اسہ نظریاتی موہ کش ئس اس۔ اودے ضیاء الحق نا فوجی حکومت 1979 ٹی تربت ٹی دزگیر کرے و اِرا سال بندی کننگ آن گڈ مارچ 1981 ٹی پھاؤ تس۔
شہید حمید نا شہیدی ءِ اسہ انگریز فوجی کارندہ ئس خون پارے واہم بلوچستان نا سیاسی تپہ آک حمید بلوچ نا شہیدی ءِ اونا سخت انگا قوم پرست خیال آتا ردعمل پارہ۔
شہید حمید سیاسی زند ئنا بناء ءِ بلوچ اسٹوڈنٹس آرگنائزیشن نا تلہ آن کرے و تینا شہیدی اسکان او اسہ نظریاتی موہ کش ئسے نا حیثیت ئٹ چاننگا کہ۔ شہید حمید بلوچ نا شہادت آن گڈ اونا زائیفہ تینا پوسکن ودی مروکا مسڑ بانڑی کن تینا تیبہ زند ءِ گدریفے و سلطنت عمان ئٹی جَہی مس۔
شہید حمید تینا بندی مننگ نا وختا تینا مسڑ بانڑی نا پنا اسہ کلہو ئس رادہ کرے، او کلہو گڈ سر ئٹ بلوچستان نا قوم پرست سیاسی تحریک ئٹی اسہ نظریاتی لٹریچر ئسے نا حیثیت ئٹ جاگہ کرے ہرادے اینو ہم قوم پرست سیاسی باسک آک فکری حوالہ ئٹ خوانِرہ و دادے تینا نظریاتی لٹریچر نا بشخ مننگ آ فخر کیرہ۔
