بلوچ نیشنل موومنٹ نا مرکزی جارکش ڈاکٹر منان بلوچ و سنگت آتے اوفتا ہفتمی شہادت نا برسی آ خراج تحسین ندر کریسہ پارے کہ ڈاکٹر منان نا وڑ اِنگا سیاسی رہشون،بلا دانشور، علمی و سیاسی شخصیت آک کرن آ تیٹی ودی مریرہ۔ اوفک بلوچ راجی تحریکءِ اوار کننگ کے،لس بندغاتا اوار مننگءِ و آجوئی نا کلوہ ءِ اُرا اُراٹی سر کننگ آ بلو کڑدار اَس ادا کرے۔ ڈاکٹر منان دا کاریم تے ہمو وخت آ کرے وختس ریاست نا کل طاقت و مشینری بی این ایمءِ خلاس کننگٹی لگوک اسُر۔
جارکش پارے کہ ضلع مستونگ نا ہند کلی دتو ٹی ڈاکٹر منان بلوچ و سنگت آتے ریاست ہمو وخت آ شہید کرے وختس اوفک تنظیمی دورہ سیٹی بی این ایم مستونگ نا سرگرم باسک شہید اشرف بلوچ نا مہمان جاہ ئٹی شامءِ گدریفنگ اسُر۔ اوفتو اَوار تینٹ اشرف بلوچ، اونا اِیلُم حنیف بلوچ پِنی آ ورنا آ دانشور و نوشتہ کار بابو نوروز بلوچ و ساجد بلوچءِ قوضہ گیر ریاستی لشکر بیدردی ئٹ شہید کرے۔
اوفک پاریر کہ ڈاکٹر منان نا شہادت راستی آ اسہ پُر مفروکو نسخان ئسے ولے اوفک تینا زیات محنت،تدبر، علم و فلسفہ و رویہ نا سوب آن بی این ایم و بلوچ راجی تحریک کن بے کچ باسک ودی کرینے اینو اونا میراثءِ مونی دننگ کن جُہد کننگءُ۔ ڈاکٹر منان جان ہر وخت بی این ایمءِ اولیت تننگ و اَوار کننگ کن زور تِسکا۔ اونا کڑدار و اونا کاریم نا وڑ ہر وخت نن کن رہشونی کرور۔ اونا زی آ عمل کریسہ نن شہیداتا منزل آ سر مننگ کینہ۔
جارکش پارے کہ ڈاکٹر منان بلوچ شہید چیئرمین غلام محمد نا شہادت آن پد بی این ایمءِ مونی دَننگ کن اسہ بلو کڑدار اس ادا کرے و دشمن نا عزائم تے مش تیٹی اوار کرے۔ واجہ غلام محمد و ڈاکٹر منان بلوچءِ شہید کریسہ دشمن نا سوچ اسک کہ اوفک بلوچ راجی تحریک و بی این ایمءِ نزور و ختم کرو ولے اینو بی این ایم ڈیہہ و ڈنی ڈیہہ تیٹی راجی آجوئی کن بلو کڑدار اس ادا کننگءُ ۔
اوفک پاریر کہ پاکستان بلوچ راجی رہبر،دانشور و باشعور بندغاتے اَسِٹ اَسٹ کریسہ نشانہ کرینے تاکہ بلوچ راج ئنا توارءِ بند کے ولے پاکستان تینا کل زوراخی تے آن پد ہم تینا عزائم تیٹی بے سوب مسونے۔
نن ڈاکٹر منان بلوچ،نوروز بلوچ،اشرف بلوچ، حنیف بلوچ و ساجد بلوچءِ خراج تحسین ندر کینہ کہ اوفک بلوچ وطن نا آجوئی کن تینا زند آتے ندر کریر۔ نن کول کینہ کہ بلوچ شہیداتا مشنءِ مونی دننگ کن ہچ وڑ ئنا قربانی تے آن خیرہ مفرون۔ آجوئی بلوچ راج ئنا بختءِ،تدوکا ہفتاد سال آن پاکستان نا برخلاف جدوجہد دا ہیت ئنا ثبوتءِ کہ بلوچ راجءِ بے توار کننگ و ختم کننگ پاکستان کن نا ممکن مسونے۔
