بلوچ اسٹوڈنس آرگنائزیشن آزاد نا مرکزی جارکش تینا درشان ئٹی پارے کہ راجی جُنز ئنا آبیاری و اوتے مّزل مقصود آ سر کننگ ئٹی سیاسی رہنما آتا بلو کڑد ئسے ، ارا ہم راجی جنز ئس مرے لس مخلوق نا حمایت آن بیدس مننگ کپک ، لس مخلوق و راجی آجوئی نا جنز اکن موبلائزیشن کروکا تحریک نا روح روان مریک ، ڈاکٹر منان ہمو ہستی تے آنءِ اراکہ بلوچ راجی آجوئی کن جُہد و جہد ئنا توارءِ بلوچستان نا اُرا اُراٹی سر کریسہ شہادت نوش کرے ، تینا شہادت اسکان اوفک راجی آجوئی نا جنز ئنا آبیاری کن دے و شام پند خلنگ اسُر۔
جارکش پارے کہ بلوچ راج اراکہ تدوکا سال تیٹی ریاست پاکستان نا نیمہ آن نسل کُشی مننگءِ ۔ریاستی لشکر و ڈکھوک ادارہ آک ڈیہی و جہانی قانون آتے لتاڑیسہ بندغاتے ابید عدالت آن دزگیر کیرہ پدا رند ئٹ شہید کیرہ ۔ ارا دروشم ئٹ شہید ڈاکٹر منان جان و اونا سْیاسی سنگت آتے سُمکاری کریسہ شہید کرے ولئے دا بلا جرمءِ کننگ آ پاکستانءِ دِسکا جہانی ادارہ آتا نیمہ آن جوابدہ کننگ متو۔
جارکش مُستی پارے کہ اسہ نیمہ آن ریاستی لشکر بلوچ سیاسی جہدکار آتے ٹک کننگءِ ، ارا بلوچ
راج آ مروکا ظلم ئنا برخلاف توار چست کیرہ ،ایلو نیمہ آن ریاست نا بلُنی ٹی مذہبی شدت پسند تنظیم آک و ڈیتھ اسکواڈ ہر ہمو باشعور آ بلوچءِ خلیک اَرا کہ بلوچ نا زی آ مروکا ظلم ئنا بر خلاف توار بڑز کیک ۔ ریاستی ادارہ آک ہزارہ بلوچ آتا بیگواہ کننگ ،ہزارہ آتا جون آتے بٹنگ، دُن کہ ڈاکٹر منان، شہید رضا جہانگیر توں اوار سیاسی لیڈراتے ٹارگٹ کلنگ نا پن ئٹ شہید کرینے۔
اجتماعی قبر آتیٹی سد آتا کچ ئٹ بندغ آتا جون رسینگانے ، ارافک پجار کننگ نا ہم قابل متنو ، ارافتے ریاستی لشکر نا بندغاک کُل ئنا مونا ابید عدالت آن دزگیر کریسہ بیگواہ کرینو ۔
جارکش مونی پارے کہ راجی جنز ئٹی آقا و غلام ،حاکم و محکوم ظالم و مظلوم، بالادست و زیردست طاقت آتا نیام ئٹی کشمکش و جنگ و جدل نا تیوعہ انسانی تاریخ ڈاکٹر منان نا وڑ اِنگا آشوبی کڑد آتے آن پُرے، ارافتا علمی بصیرت ، تحریک توں شعوری اواری، جوزہ توں اوار پرجوش سرگرمی تینا راج و چاگردءِ آشوب و آجوئی آن روشناس کننگ آ شہید ڈاکٹر منان جان اولی کڑدارءِ ادا کرینے ۔
ڈاکٹر منان و اونا ہمراہ آتا شہادت ، راجی جنز ئٹی بلو نسخان ئسے ولے اَرا جدوجہد آجوئی نا آبیاری کن اوفک قربانی تسونو ہمو جدوجہد دے پہ دے مظبوط مننگءِ و ہمو دے مُر افک ارادے بلوچ راج اوفتا نشان تروکا مزل آ رسینگو ۔
