آجوئی آن بیدس ہر وڑ نا شونداری خوشحالی و جارات ئنا زند اسہ دھوکہ سے آجوئی ہچبر دون تولوک تولوک ٹیکی ٹی ملپک بلکن دا جہد آن ملوکا بھرم ءِ ، انسان نا تینا آجوئی نا وصف و چاننگ نا سوج سادہ ولے کڑمب و پیچیدہ ءِ ، اسہ وار اگہ او راستوکی ءِ دوئی کے تو ایلو ہیت آک پٙد سلیرہ ، آجو آ انسان تینے چاگڑد ئٹی بدلیفنگ نا ارادہ کیک تینا جوان انگا کڑد ءِ سر ایتک ، آجو آ انسان دیر ئنا وڑ تینا کسر ءِ تینٹ دیک ۔ تاریخ ئٹی اسہ آجو ءُ انسان ئس ہی تاریخی ءُ کڑد ئس سر ایتک ۔
کنا فکر ئنا سنگت , ہچ سرپند مفرہ نا دا بھلا قربانی نا فیصلہ و قربانی آ انت نوشت کیو انتئے کہ نا دا بھلا کڑد کنا پنوکا لوز آتا محتاج اف بس نا یات آتے قلم نا نوک ئٹ خُلنگ اُٹ اگہ گڑاس ردی مس کن کونا نا پوہ آ انسان ءِ بشخس۔
عمر نا ہمو وخت ہراٹی اسہ ورناس تینا ذاتی آ خواہشت آتون پُرچس مریک ، اسہ مسڑ ئسے نا مہر ئٹی تینا وخت ءِ گدریفک ہندا وخت ئٹی نی دا غٹ گڑاتے تینا ذات و جارات نا زند اتون اوار اسہ پارہ غا تخیسہ اسہ بھلو قربانی سینا فیصلہ کیسہ ۔
آفریں ءِ نے کنا فکر ئنا سنگت ۔ ہندا تو دا قومی جہد ئنا زیبائی ءِ کہ نن دتر نا رشتہ غا تے پد بٹیسہ فکری آ رشتہ غاتے زیات سرپند مرینہ انتئے کہ ننا غٹ سرمایہ ہندا فکری آ رشتہ غاک ءُ ہراتے نن تورسہ مدامی کن زندہ سلینہ ۔
عمر جان پورو اسہ سال ئس نی ننتون اوار گدریفیس و دا وخت ئٹی نی ننے آن بھاز خڑک آن خناس نی تینا کچ ئنا ورنا تیان بھاز جتا اسُس ، نیٹی اسہ دڑد ئس ڈھکوک ئس ہرا نا بشخندہ ٹی خننگاکہ ۔
نے یات ءِ نی دا پاریسہ کامریڈ ماما اسہ دے ئس ای ہم ریحان آنبار دشمن آ جلہو کروٹ ۔ و ای مخیسہ پاریٹہ کہ نی سہب ئنا وختی تغ آن بش مننگ کپیسہ و نیمروچ اسکان خاچوک اُس و پاسہ ریحان آنبار مریوہ ۔
ریحان آنبار مننگ کن ہمو دڑد بکار ءِ ہرادے ریحان خُڑک آن محسوس کریسہ اوڑا سخت انگا حالیت آ تیٹی اسہ بھلو فیصلہ ئس ہلیسہ ننے نا اومیتی آن کشسہ قومی جنز ئنا رُخ ءِ پین کنڈ ئسے آ درے ۔ ہندا ہیت آ ہر وخت ای نے چڑیفیٹہ ۔
ولدا نی حالیت آتا سوب آن مُر مسُس و تینا فرض ءِ سر تننگ کن محاذ آ ہناس کنے سما ہلو کہ ولدا نے خننگ نا موقع ملپک و نیتون ہیت کننگ کپروٹ دا دڑد اینو ہم کنا خنتے خڑینکی کیک و ای تنیا اسہ خل ئسے آ تولیسہ بے کچ اوغنگ آن اُست ءِ سُبک کیوہ و تینتون تینٹ پاوہ کہ کنا سفر و دا نا خید و خواری آن چُڑوکا جون کنا دا جہد نا دا بھلا قربانی نا مونا ہچ ہم اف ، نی کٹاس انتئے کہ عمر ئنا دا چنکا وخت ئٹی نی ریحان آنبار مننگ نا قول کریسوس و ہندا قول ءِ نی مون روشنائی و مخیسہ دلیری ئٹ پورو کریس جہد ئنا دا سفر ئٹی نی ننے آن مونی ہناس نی کٹاس عمر جان نا خوشبو دا مِش ئٹی ہر کنڈا تالان مننگ ءِ و نی مدامی کن زندہ سلیسوس ۔
