بلوچ اسٹوڈنٹس کونسل لاہور نا کنڈ آن بلوچستان ئٹی برجاء دے تیٹ خوانندہ آتا زوراکی نا بیگواہی تیٹ ودکی و بیگواہ آ بندغ تا آجو وے مننگ نا برخلاف لاہور نا لبرٹی چوک آ زہر شانی کننگا۔
دا زہرشانی ٹی بلوچ نرینہ و زالبول خوانندہ آتون اوار ایلو بندغ آک اوار مسر و زہرشانی ٹی اوار مروکا پاکستانی لشکر نا دو آن زوراکی ئٹ بیگواہ مروکا بلوچ خوانندہ آتا عکس آتے ہم دو ٹی توریسر۔
دا وخت آ برانزی تا پاننگ اس کہ بلوچستان ئٹی برجاء زوراکی نا بیگواہی تا لڑ اسہ وار پدا مرغن کننگانے، تدوکا منَہ دے ئٹی بلوچستان نا جتا عیلاقہ تیان داسکان کیہی خوانندہ و ایلو شعبہ آتیان تعلقداری تخوکا بندغ آک زوراکی نا بیگواہی تا گواچی مسنو و کس ئنا بارو ئٹ اوفتا خاہوت ءِ حوال رسینگتنے کہ او اراڑیکو و اَرا ڈوہداری ٹی ادارہ آک اوفتے دزگیر کرینو۔
او پاریر کہ لاہور ئٹی تولوکا بندغ آک ننے خنِر و اندازہ خلیر و تینا سوج آتا ورندی پٹیر کہ بلوچ آتا ویل انت ءِ، ننے آن پنجاب نا ہندیک گیشتر دنو سوج کیرہ، داسا نن کہ داڑے ہر ارٹمیکو دے تینا سنگت آتا آجوئی کن برانز کینہ تو بائدے اوفتے اندازہ مرے کہ ننا ویل انت ءِ۔
