منَہ دے مُست ماہل بلوچ ءِ چارمیکو وار ریمانڈ کن عدالت ئٹی ہتنگا و ماہل بلوچ نا بر خلاف ہچو ثبوت مفننگ آن بیدس دوارہ پولیس ءِ پانزدہ دے نا ریمانڈ آ تننگا۔ صوبائی حکومت و وزارت داخلہ کمیٹی جوڑ کرینو ہرا ہودہ مارچ آن، اوفتا پاننگ نا رد ئٹ، پٹ و پول ءِ بناء کرو۔
ماہل بلوچ آ خلوکا دوبہ آک دروغ ءُ و دروغ ئنا دوبہ غاتیا ماہل بلوچ نا کیس ءِ مرغن کننگو۔
17 فروری نا نن ننا اُرا غا سی ٹی ڈی نا کنڈ آن چھاپہ خلنگا و چُنا تتون اوار ننا اُرا نا غٹ بندغ آتے دزگیر کننگا، اُرا نا تلاشی ہلنگ آن گڈ ننا پیسہ و ارزشتی آ گڑا تے ہم اوار دریر۔ تیبہ غا نن ءِ خلیس ئٹ گدریفنگ آن گڈ ہرا وخت ننا اُرا نا غٹ بندغ آتے یلہ کننگا و ننا ارا آن ہچو بےقانودی ءُ گڑا خننگتو و ماہل ءِ خودکش جیکٹ برآمد مننگ نا دوبہ خلیسہ داسکان بندی کرینو۔
ایف آئی آر ٹی سی ٹی ڈی کنا بھاجائی ماھل بلوچ آ دوبہ خلکنے کہ او اسہ خودکش بمبار ئسے و اودے تراکی آ مواد تون پارک آن دزگیر کننگانے ہرا کہ پاش ءُ دروغ ئسے و اندا دروغ ئنا پن آ عدالتی کاروائی چلنگ ئٹی ءِ و کیس ءِ مرغن کننگ نا کوشست مننگ ئٹی ءِ۔
نن بندغی حق آتا ادارہ تا کمک ئٹ شال ئٹی تولوک برانز کرینن۔ تومکا وار پولیس و وزارت داخلہ نا کنڈ آن ضمانت تننگا کہ ماہل ءِ یلہ کننگو۔ عدالت و قانود آ باور کریسہ نن تینا برانز ءِ ایسر کرین ولے ماہل بلوچ نا بر خلاف ثبوت مفننگ آن بیدس وار وار آ پولیس ریمانڈ منظور کننگک و ننے تڑی تننگک کہ ماہل کن برانز نا کسر ءِ ہرفپبو۔
شرف مند آ صحافیک،
قانود و عدالت آ باور تخنگ و غٹ قانودی کاروائی تے پورو کننگ آن بیدس و ازیت سگنگ آن بیدس ننا خاہوت ءِ تڑی تا چرجوئی ایسر مننگ اف و کنتو اوار کنا اُرا نا پین اِرا بندغ ءِ دزگیر کننگ نا تڑی تننگ مننگٹی ءِ۔ منَہ دے مُست پولیس ننے تڑی تننگ کن ننا اُراغا بسس۔ ہرا نا سوب آن کنا خاہوت نا بندغ آک خلیس نا گواچی ءُ۔ خاہوت نا ایلو بندغ آتے بیگواہ یا نسخان تننگ مف۔
صحافی ایلمک!
ننا باوہ و ایلم تیان پد ننا اُرا ٹی نرینہ کس اف و داسا ننا بھاجائی ءِ دزگیر کننگ آن گڈ ایلو بندغ آتے ہم تڑی تننگک کہ اگہ ماہل بلوچ کن برانز کریرے تو ایلوفتے ہم بیگواہ کننگو۔
عدالت انصاف نا خواست آتے پورو کننگ اف و عدالتی کاروائی تا پن آ ماہل بلوچ ءِ بندی کننگانے و اگہ دا لڑ برجاء مس ننتو بیدس برانز آن پین ہچو کسر مفرو۔
نن سیاسی تنظیم و بندغی حق آتا ادارہ آتون اوار میڈیا آن خواست کینہ کہ ماہل بلوچ تون اوار ایلو زوراکی ئٹ بیگواہ مروک بندغ تا آجوئی کن ننتو کمک کیر و عدالت و وزارت داخلہ نا ماہل بلوچ نا کیس ئٹی اندا روشت مس تو نن دوارہ وزیر اعلیٰ ہاؤس نا مونا برانز کننگ آ بیوس مرون۔
بشکریہ
اہلخانہ ماحل بلوچ
