بلوچ نیشنل موومنٹ بی این ایم نا بندغی حق آتا ادارہ پانک تینا شنگ کروکا بیان ئٹی پارے کہ سراج و مہران ہڑتوما ایلم تے اِرا دے مُست گیشکور فوجی کیمپ آ بٹِنگا۔ داسا اوفتا باروٹ اوفتا خاہوت ءِ ہچو حوال دو بننگ اف، اوفتا خاہوت ڈکھیائی ءِ، و اوفتا خیریت ئٹ واپسی نا انتظار ئٹی ءِ۔
او پارے کہ گیشکور بلوچستان اسہ ہندنو جاگہ ئسے ہراڑے لشکری زوراکیک بے کچ ودانو۔ ہراڑے تدوکا وخت ئٹی ماسٹر خدابخش، ڈاکٹر ثناء اللہ و داد بخش ءِ لشکری کیمپ آ بٹنگیسہ اوفتا خون کننگا و اوفتا جون تے خسنگا۔ دا عیلاقہ ٹی خلیس و بےدادیک چرجوئی ئٹ برجاء ءُ۔
سراج ءِ مُست ہم پاکستانی لشکر زوراکی ئٹ بیگواہ کریسس، اِرا سال اسکان سگ آن ڈَن ءُ اذیت تننگ آن گڈ اودے یلہ کننگا، ولے اوڑا داسکان بےدادی تا نشان آک ئسر۔ اونا ایلم مہران، ہرا متحدہ عرب امارات ئٹی محنت مزوری کریکہ، اندا زوت ئٹ چھٹی کِن اُراغا بسس۔
بیان ئٹی پاننگا کہ زوراکی نا بیگواہی بندغی حق آتا سخت لتاڑ ءِ۔ ہر بندغ ءِ مناسب کارروائی و انصاف نا رد ئٹ ٹرائل نا حق تننگ مرے۔ داسا وخت بسُنے کہ دا گندہ غا کاریم تا ذمہ وار آتیان ورندی ہلنگ مرے۔ جہانی برادری نوٹس ہلے و سراج و مہران کن انصاف نا خواست کے۔
او پارے نن بندغی حق آتا تنظیم، باسک و ذمہ وار ادارہ تیان خواست کینہ کہ او زوراکی نا بیگواہی تا برخاف توار بڑز کیر۔
پانک ئنا پاننگ اس کہ نن سراج و مہران نا خاہوت تون اوڑدئی کن سلوک اُن، ہرا سوچ آن ڈن و بے بندغی حالیت آن گدرینگنگ ءُ۔ دا ننا ذمہ واری ءِ کہ سیوتی ئٹ انصاف نا خواست کننگ کن اوفتا توار جوڑ مرین۔
