بلوچستان اسہ ہندنو خطہ ئسے ہراڑے نے ہر کنڈ آن ظلم و بربریت نا داستان بِننگ کِہ مِلّیک۔ دا ظلم و بربریت نا نشانہ جوڑ مروکا لمہ و ایڑ تے روڑ آتا تینا بندغ آتا آجوئی کن برانز آتیٹ بے وسی و مونجھائی ئٹ خننگ آ است دِتر نا خڑینک ہوغِک۔
ہمو لمہ غاک ہرافتا بیگواہ آ چُناک ہراکہ اوفتا پیری نا ٹیک اسُّر اوفتان دا ٹیک ئے پُھلار۔
لمہ غاک ہرافک تینا الواد نا خوئشی تے خننک کے بے جارات اسُّرہ اینو تینا الواد آتے خننگ کِن سکھیرہ۔
لمہ غاک برانز آتیٹ تینا چُنا تا عکس آتے دُو تیٹی ہرفِسہ خڑینک آ خن تیتو دا گمان کیرہ کہ اَراتم اوفتا دا وے کروکا ڈوھ ئنا سزا و اذیت نا دیک چھٹور و او تینا خاہوت تون اوار مہالو آن بار خوئشی ئٹ رہینگور۔
ہمو ایڑک ہرافتے کالج ، یونیورسٹی تے آ خواننگ کے ہنوئی اس ہرافتے کن اوفتا ایلم تا خن تیٹی مسخت ئس او ایلمک ہرا تینا ایڑتے خوانفنگ خواہارہ اینو ہمو ایلم تا عکس آتے دو تیٹی ہرفِسہ ایڑک ہر شہر ئٹ مروکا برانز آتیٹ دا اومیت ئٹ کارہ کے نوائے کس ئس اوفتا توار ئے بِنِہ و نوائے اوفتے دا اذیت نا گواچی کروکا تے اوفتے آ رحم برے۔
بیگواہی اسہ ہندونو اذیت ئسے ہرا ہر بروکا دے ئتون ودھِسا کیک۔
ننا بندغ آک ہرافتے مچٹو تکلیف ئس مسکہ نن فریشان مسُنہ اینو ننا ہمو بندغ آک زندان آتیٹ بند ءُ۔
بھاز آ ایڑک اریر ہرا تینا ایلم تا بیگواہی نا برخلاف توار ہرفنگ ءُ۔
او ایڑ تیان اسٹ سائرہ بلوچ ءِ۔
سائرہ ہم ہمو ایڑ تیان ءِ ہرانا زند تینا ایلم نا آجوئی کن برانز آتیٹی اوار مننگ ئٹ گدرینگانے۔
سائرہ ہِچ وخت ئس ہم دا گمان ئے کتویسَس کِہ ہمو ریاست ہرانا بارو ئٹ پارہ کہ لمہ آن بار مریک ہمو ریاست اودے ایلو اونا خاہوت ئے دا وے کروکا ڈوھ ئنا سزا و وے چھٹوکا اذیت ئٹ شاغانے۔
آصف بلوچ تینا خلق ئنا اسٹ انگا وَلِفوک اسّ ہرادے ریاست پنچ سال آن زندان ئٹی بند کرینے۔ آصف بلوچ تینا ایڑ تیکن گچینو مسخت خناسس او تینا ایڑ تے ایلو شہر آتا خواننگ کن گدرینگ خواہاکہ ۔ ولے اینو آصف بلوچ نا ایڑک تینا ایلم نا آجوئی کن ایلو شہر آتا برانز کننگ کن کارہ۔
ریاست نہ بیرہ آصف بلوچ ، رشید بلوچ ئے بیگواہ کرینے بلکہ اوفتا تیبہ خاہوت ئے دا اذیت آن گدرینگ ءِ ۔ سائرہ و اونا خاہوت آصف ایلو رشید نا بیگواہ مننگ آن دا پنچ سال ئٹی ہرا اذیت آتے سگّھانو اوفتا اندازہ ئے خلنگ نن کن مشکِل ءِ۔
دا پنچ سال ئٹی سائرہ ہر ہمو در ئے ٹھکیفینے ہراکان اوفتے انصاف نا چھنکو اومیت ئس مسُّنے۔ ولے ریاست اوفتا کمک ئے کننگ نا جہہ آ اوفتے تینا ایلم نا آجوئی کن توار ہَرفنگ آن توننگ ءِ ۔اوفتے تڑی تیرہ تانکہ او تینا ایلم کن توار ہرفپس۔
