کیچ ئنا بھلا شہر تربت ئٹی آسکانی آپسر آن تدوکا شام پاکستانی لشکر نا دو آن بیگواہ مروکا شبیر ولد بشیر احمد نا ایڑ ہندی بندغ و تربت سول سوسائٹی کنوینر گلزار دوست تون پریس کانفرنس کرے۔
ہندا رد ئٹ کالخواک شابیتی رد ئٹ پاریر کہ تدوکا شام دو بجہ نا وخت آ لشکری بندغ آک اوفتا اُرا ءِ گھیرہ کریر، زالبول و چُنا تے آ تشدد کریسہ اوفتا ایلُم شبیر ولد بشیر ءِ جبر ئٹ تینتون دریر واہم اونا بابت آ ننے ہچو حوال ئس اف و نہ دننگ نا وخت آ ننے اونا میار ءِ پاریر۔
اوفک مونی پاریر کہ شبیر اسہ ڈرائیور ئسے ہرا لاری چلیفسہ اُرا نا مون ئٹی ءِ۔ اگہ لشکری بندغ آتا رئیا اونا بابت آ شکایت ئس مسُنے یا اونا برخلاف معلومات مسُنے ننے آن انتئے ڈھکنگانے۔ دزگیری نا وخت آ نن وار وار لشکری بندغ آتان اونا میار آتا بابت آ سوج کرین ننے جواب تننگ نا جاگہ آ ننے آ تشدد کریر و شبیر ءِ گِر کریسہ ننا مونا لاری ٹی سوار کریر۔
ایسر ئٹ او تینا ایلُم نا آجوئی کن کمشنر و ڈپٹی کمشنر کیچ و ڈی سی آن خواست کرینے کہ اوفک باز انگا بندغ آتے یلہ کریفینے او شبیر نا آجوئی کن نن تون کُمک مریر و بندغی حق آتا تنظیم ءُ سول سوسائٹی آن اوفتا ایلُم نا آجوئی کن توار بُڑز کیر۔
اگہ اوفتا ایلُم ءِ زوت یلہ کننگ متو اوفک پُر ایمن برانز کرور و ریلی ئس کشسہ ڈپٹی کمشنر کیچ، کمشنر مکران نا دفتر آتا مونا و ایلو جاگہ تا برانز کرور۔
