بلوچستان ئٹی جبر ئٹ بیگواہی تا برخلاف بیگواہ بندغاتا خاہوت آتان نیمہ آن عید ئنا دے برانز و اواری کن ٹوئیٹر آ اسہ کیمپین ئس کننگ نا زی آ پاکستانی نیوز چینل آک پروپیگنڈہ کرینو ڈیہہ آن پیشن نا بلوچاک ریاست نا برخلاف پروپیگنڈہ کننگ ءُ ۔
واہم بیگواہ آ بلوچاتا خاہوت آک دا ہیت ءِ رد کننگ ءُ ۔ کراچی آن بیگواہ مروکا عبدالحمید زہری نا مسڑ سعیدہ حمید نا دا رد ئٹ پاننگ ءِ اگہ پاکستانی میڈیا ءِ ننا برانز آک ڈنی سازش لگیرہ گڑا اوفک ننا بندغاتے آجو کیر و پدا دا سلسلہ ءِ بند کیر کہ ڈنی سازش ئس مف۔
سعیدہ حمید نا مونی پاننگ ءِ کہ ہرا میڈیا نا زی آ نن اُمیت تخان اُن کہ اوفک ننا توار مرور، اوفک ننا توار ءِ بند کننگ ءُ ۔
ارٹمی نیمہ آن سوشل میڈیا باسک آتا پاننگ ءِ بلوچستان ئٹی جبر ئٹ بیگواہی تا بر خلاف برانز آک کیہی سال آن برجاء ءُ و ہر سال عید ئنا دے جبر ئٹ بیگواہ آ بندغاتا خاہوت آک جتا جتا انگا جاگہ تیٹی برانز و بلوچ سوشل میڈیا باسک آک اوفتون اواری کن سوشل میڈیا ٹی کیمپین کیرہ۔
یاتی مرے کہ دا عید ئنا دے بلوچستان نا جتا انگا ہند آتیٹی وی بی ایم پی و جبر ئٹ بیگواہ آ بلوچ خاہوت آتا نیمہ آن برانز کننگو۔ اوفک زند ئنا ہر بشخ آ تعلق تخوکا بلوچ و بندغ دوست آتان اواری نا خواست کرینو۔
