بلوچستان نا ضلع خضدار ئٹی جبر ئٹ بیگواہ آ بندغاتا خاہوت آتا نیمہ آن " جبر ئٹ بیگواہی تے آن بیوس" نا پن ئٹ پمفلٹ بشخنگانے۔
پمفلٹ ئٹی پاننگانے کہ تدوکا بیست سال آن بلوچستان ئٹی جبر ئٹ بیگواہی نا تدینیک تسلسل ئٹ برجاء ءُ و دا سلسلہ ہڑدے زیات مننگ ءِ، کیہی بیگواہ آ بندغاتا جون آتے بٹنگانے و ہزار آتا کچ دائسکان غیر قانونی دزگیری ٹی جانور آتاںلن بدتر ءُ زند گدریفنگ ءُ ، اوفتا بابت ئٹ دائسکان اوفتا خاہوت تون اوار کس ءِ ہم خبر اف۔
پمفلٹ ئٹی مونی پاننگا کہ بدبختی آن ننا بے تواری نا سوب آن ہندا سلسلہ ہڑدے زیات مننگ ءِ اگہ اینو بلوچستان ئٹی ہزار آتا کچ بندغاک جبر ئٹ بیگواہی نا وڑ اِنگا جرم ئنا بر خلاف سلوسُر یا بیگواہ مروکا بندغاتا خاہوت آتون اوار مروسُن گڑا ریاست دا وڑ نا گام ہرفتوکہ ولے اینو ننا بے تواری نا سوب آن بلوچستان ئٹی ہچ اُراس ہم رکھوک اف۔
خاہوت آتا مونی پاننگ اسّ کہ جبر ئٹ بیگواہی تا بر خلاف اسہ وار پدا بیگواہ آ بندغاتا خاہوت آک عید ئنا دے عید کننگ نا جاگہ تینا چُنا و ایلُم تیکن برانز کننگ ءُ و نن اُمیت کینہ کہ شعور یافتہ و با علم بلوچ آک دا سْیاسی جدوجہد ئٹی اوفتوں اوار مریر۔
خاہوت آک چُنکا عید ئنا دے شہید عبدالرزاق چوک ئنا زی آ برانز ئنا پڑو کرینو۔ ایلو نیمہ آن حق دو تحریک ہم گْوادر تون اوار مکران ئٹی جبر ئٹ بیگواہی تا بر خلاف برانز کرو۔
