خضدار: بلوچستان نا ہند خضدار آن پاکستانی لشکر نا دو آن بیگواہ مروکا ارا ورنا یلہ مسر۔
شابیتی حوال آتا رد ئٹ تدوکا سال ئنا آخر ئٹ خضدار نا ہند گریشہ آن پاکستانی لشکر ارا ورنا سراج نور و عارف بلوچ ئے بیگواہ کریس اَس۔
پاکستانی لشکر نا دو آن ورنا تا بیگواہی آن پد اوفتا خاہوت آک کراچی پریس کلب آ پریس کانفرنس کریسہ پاریر عارف ولد گاجیان سریچ گریشہ نا ہندی و سراج نور اسپینکری گریشہ نا ہندی ئے اوفتا باوہ پیرئی آ ہند گریشہ خضدار آن ہمو وخت جبرئٹ بیگواہی نا گواچی کریر ہرا وخت اوفک خڑک ئنا ہند پوگی ٹی تینا سیال آتون ملنگ آن پد موٹرسائیکل آ واپس بننگ اسر۔
خاہوت آتا رد ئٹ بیگواہ کننگ آن مست اوفتا زی آ سمکاری ہم کننگا ہراڑان اوفک تینا موٹرسائیکل آن تمار اوکان پد اوفتے بیگواہ کننگا۔
اینو ارٹ انگا ورناک آجو مریسہ تینا ارا تا سَر مسر، اوفتا خڑک ئنا سیالاک ورنا تا آجوئی ئے پک کریر۔
یاتی مرے کہ بلوچستان ئٹی جبرئٹ بیگواہی تا سلسلہ کیہی وخت آن برجاء ئے۔ ،باز انگا بیگواہ مروکا بندغاک آجو مسُنو واہم بیگواہ بندغ آتے کن توار بڑز کروکا تنظیم آتا رد ئٹ 20 ہزار نا کچ بندغ انگہ بیگواہ ئے ۔
