حوال آتا رد ئٹ بلوچستان نا دارالحکومت کوئٹہ آن تدوکا سال 15 جنوری آ جبر ئٹ بیگواہی نا گواچی مروکا ورنا نا آجوئی کن خاہوت نا نیمہ آن پُر ایمن برانز کننگا۔
برانز ئٹی بیگواہ آ بندغاتا خاہوت و خوانندہ تہ تنظیم، جتا انگا فکر ئنا بندغ اتوں زالبول آک ہم اوار اسُر۔
برانزیک دوتیٹی بیگواہ مروکا بندغاتا عکس، پلے کارڈ و بینرز دوٹی کریسر،ہرافتیٹی بلوچستان آن جبرئٹ بیگواہی تہ بر خلاف نعرہ نوشتہ اسک۔
ہندا رد ئٹ ہیت کروکاک بیگواہ آ عبدالخالق قمبرانی توں اوار ایلو بیگواہ مروکا بندغاتا آجوئی کن خواست کریر۔
ہیت کروکاک پاریر بیگواہی تہ سلسلہ برجاء ءِ و پین تیزی توں ایف سی،سی ٹی ڈی و ایلو ڈھکوک ادارہ آک بندغاتے بیگواہ کیرہ و پدا دروغ ئنا مقابلہ تیٹی شہید کیرہ۔ بلوچستان ئٹی بندغی حق آتے مُدامی لتاڑنگ مریک ولے بندغی حق آتا تنظیم آک بے توارءُ ۔
دا رد ئٹ بیگواہ آ عبدالخالق نا ایڑ بیبو بلوچ پارے کہ اونا ایلُم آجو کننگ مرے، ننے اَرا جرم ئنا سزا تننگ مننگءِ ،دا ریاست ننے اذیت تروکا زند آتاں گدریفنگءِ ارا تکلیف دہءِ ۔
اوفک تینا ایلم توں اوار ایلو بیگواہ مروکا بندغاتا آجوئی نا خواست کریر۔
