بلوچستان نا بھلا شار شال آن زورانسری بیگواہ مروکا محمد رحیم زہری نا لمہ و چُنکا چُنا یلہ مسُر ولے اونا جند زائفہ توں دسکا بیگواہءِ ۔
احوال کار پک کرے کہ محمد رحیم زہری نا لمہ و اِرا چُنکو چنا دعا زہری و یحیٰ زہری یلہ مسُر ۔
حوال تا ردئٹ محمد رحیم زہری زائفہ توں دائسکاں بیگواہءِ ۔
پک مرے کہ ہندا بندغ آک 3 فروری آ گشکوری ٹاؤن ، ناشناس کالونی شال آن سرچ آپریشن نا وخت آ دزگیری آن پد بیگواہ مسُر ، ہرافتہ بابت ئٹ پدا ہچو چاننگداری ئس رسینگتنے۔
محمد رحیم زہری و اونا خاہوت نا بندغ آتے دزگیر و بیگواہ کننگ آ جتا اِنگا مکاتب فکر حکومت آ تنقید کننگو ۔
بلوچ یکجہتی کمیٹی نا رہنماء ماہ رنگ دا باروئٹ پارے کہ بلوچستان ئٹی جمہوری قوانین نہ سہی جنگی قوانین توں نافد کیر ، بلوچ زالبول و اوفتا چناک دا ظلم آن بچنگ تو کیر ، او ہم محفوظ افس ، شال آن محمد رحیم زہریءِ اونا خاہوت نا پنچ بندغ اَتوں اوار بیگواہ کننگا ، ارافتیٹی اسہ سالی آ مسڑ دعا ، چار سال ئنا مار یحیٰ ، زائفہ رشیدہ و لمہ بس خاتون اوارءُ ۔
شفیق ایڈوکیٹ نوشتہ کرے کہ مشرف تو کسھک ولے ساڑی جرنیل اونا پالیسیک روانو و شال آن محمد رحیم زہری و اونا اسہ سالی آ مسڑ دعا ، چار سال ئنا مار یحیٰ ، زائفہ رشیدہ و لمہ بس خاتونءِ بیگواہ کننگا، عاصم منیر مچیٹو شرم ئس ؟ مچیٹو حیا ئس مرے۔
