کیچ آن بلوچی زبان نا نوشتہ کار ئس بیگواہ کننگا ہندُن کراچی آن کیچ ئنا ہندی ئس بیگواہ کننگانے۔
حوالکار نا رد ئٹ کیچ ئنا مرکزی شہر تربت آن بیگواہ مروکا ورنا نا پجار سخی بخش عرف سکی ساوڑ ولد اسماعیل ءِ کہ او خضدار نا ہند گریشہ سریج نا ہندی ئسے۔ سخی ساوڑ بلوچی زبان نا شاعر و اُستاد ئسے و او زبان نا راہبند ءِ خوانیفیکہ اونا رہ آ باز اِنگا بندغ آک نوشتہ کاری نا بابت ئٹ خواننگ ئٹی اسُّر۔
سخی ساوڑ نا بابت ئٹ پاننگ مننگ ءِ کہ او تربت ئٹی زمین ئسینا واپاری کن ہنانے دَرو اودے زمین ءِ ہُننگ نا نیمون ئٹ بٹنگگِنگانے و پدا بیگواہ کننگانے۔ اونا خاہوت نا بندغ آک عرضی کن و موبائل نمبر نا ٹریس ئَکن پولیس تھانہ آ ہنانو ولے پولیس اوفتا عرضی نوشتہ کرینے و نہ نمبر ءِ ٹریس کرینے۔ ہندا گُمان مننگ ءِ کہ پاکستانی لشکر نا اڈ تروکا ڈھکوک آ ادارہ آتا بندغ آک اودے بیگواہ کرینو۔
ہندا وڑ کراچی آن سئے شمبے نا نیمروچ دو بجہ آ کیچ ئنا ہندی ئس بیگواہ کننگانے۔ بیگواہ مروکا بندغ نا پجار نورل ولد پنڈو ہوشاب گونڈسر نا ہندی نا پِن ئٹ مسُنے۔ نورل نا بابت ئٹ پاننگ مننگ ءِ کہ او ذہنی حوالہ ئٹ جوان متنے و علاج ئکن کراچی آ دننگانے ہرا ہوٹل آن بیگواہ کننگانے۔
یاتی مرے کہ پاکستانی لشکر و اونا ڈھکوک آ ادارہ آک ہڑدے ئی رد ئٹ لس بلوچ آتے زورانسری ئٹ بیگواہ کریسا سال آتا سال زندان تیٹی بندی کیرہ پدا اوفتے تشدد کریسا ہندُنو حالیت ئسیٹی یلہ کیرہ کہ اوفک تاں عمر ذہنی حوالہ ئٹ جوان مفسہ یا اوفتے دروغ ئنا مقابلہ تیٹی خلیرہ ہندا پارہ جھڑپ ئسیٹی خلنگانے۔
