کراچی: یانزدہ اگست آ سی ٹی ڈی نا دو آن بیگواہ مروکا داد شاہ نا ایڑ فوزیہ تینا ایلُم نا آجوئی کِن برانز نا جار خلکُنے۔
او تینا تامر ئسیٹی پارینے کہ لس مخلوق آن خواست ئے کہ برانز ئٹی بخش ہلیر۔
فوزیہ بلوچ پارینے کہ کنا ایلم داد شاہ ئے یانزدہ اگست نا نن سی ٹی ڈی والاک اُُرا غان زورانسری ئٹ بیگواہ کریر و اونا ہچو احوال ئس افک۔ داد شاہ نا آجوئی کِن نن اِرا دے ئنا برانزی گدان ئس خلکُنن ننے کس خَن ئٹی ہَتِنگ اف۔
او پارے کہ داد شاہ نا زورانسری ئٹ بیگواہی ئے اینو پانزدہ دے پورو مسُنے ولے داسکان ننے اونا بابت ئٹ ہچو سرپدی ئس تِتنو کہ کنا ایلم امر ئے و ارانگ ئے۔
زورانسری ئٹ بیگواہ مروکا داد شاہ نا ایڑ پارے کہ نن پھگہ کراچی ماڑی پور کسر آ برانز کرون ای لس مخلوق آں خواست کیوہ کہ ننا کمک ئے کیر۔
