اینو اواری نا درشانی کن کراچی ماڑی پور آن چاگڑدی باسک حبیب بلوچ، نذیر بلوچ، سندھ سبا نا موہکش انعام عباسی ، سینئر صحافی چاند نواب و ایلو بسر۔
وی بی ایم پی نا وائس چیئرمین ماما قدیر بلوچ پارے کہ سما اف اخس زوراکی ئٹ بیگواہ مروک بندغ تا جون تے ویران آتیٹ کھڈ کننگانے ہرا اینو اسکان پاش کننگتنو، ہزار آ بلوچ آک داسکان ریاستی عقوبت خانہ آتیٹ بند ءُ و ہڑدے خوانندہ آ ورنا تے بلوچستان نا جتا علاقہ آتیان بیگواہ کننگک، اندا وڑ داسالسٹ 55 ہزار آن ودیسہ60 ہزار اسکان سر مسنے اوفتیان گیشتری ہمو بندغ تا ءِ ہرافتے تدوکا دہ سال آن جنگی حالیت نا وخت آ علاقہ آتیٹ چھاپی خلیسہ بیگواہ کننگانے۔ ااوفتیٹ زند ئنا جتا شعبہ آتیان تعلقداری تخوکا بندغ اوار ءُ۔
او پارے کہ بلوچ آتے زوراکی ئٹ بیگواہ و شہید کننگ کن فورسسز و ڈھکوک ادارہ آک تینا کارندہ آتون اوار تیوہ بلوچستان ئٹ ڈوہدار آتا ٹولی تے منظم تخانو و اوفتے پیسہ و سلاء تریسہ علاقہ آتیٹ بلوچ آتے زوراکی ئٹ بیگواہ کننگ، ٹارگٹ کلنگ، و علاقہ آتیٹ خلیس تالان کننگ کن پاش الانو۔ منشیات ، اسمگلنگ و بھتہ ہلنگ داسا قانودی دروشم ہلکنے ہرا نا سوب آن علاقہ ٹی خلیس نا ماحول ودی مسنے۔ و خضدار اندا زوت ئٹ ریاستی ڈیتھ اسکواڈ کن اسہ فری زون اس جوڑ مسنے ہراڑ سلاء ہلیسہ ایف۔سی نا شیف آ ٹارگٹ کلنگ و زوراکی نا بیگواہی تا کاروائیک مریرہ و خلیس تالان کریسہ کاروبار تے بند کیرہ، خضدار نا کیہی بلوچ آتے داسکان ڈیتھ اسکواڈ نا دو آن شہید کننگانے ہراڑے گام گام چیک پوسٹ آک ساڑی ءُ۔
