اینو گدان آ اواری نا درشانی کن مسکوہی وزیراعظم پاکستان شاہد خاقان عباسی، مسکوہی سینیٹر مصطفٰی نواز کھوکھر، مسکوہی وزیر خواجہ محمد خان ہوتی، مسکوہی بنجائی وزیر ہمایوں کُرد، مسکوہی سینیٹر، حاجی لشکری رئیسانی تون اوار جئے سندھ متحدہ محاز نا مسکوہی صوبائی جنرل سیکریٹری الہی بخش بکک و ایلو بندغ آک بسر۔
مسکوہی وزیر اعظم تون تران کریسہ وی بی ایم پی نا وائس چیئرمین ماما قدیر بلوچ پارے کہ نُم پاکستان ئٹ اسہ زہم تخوکو توار اس تخرے تو نُم بلوچ آتا زوراکی نا بیگواہی تے توننگ ئٹ تینا کڑد ءِ ایسری ایتبو، مسکوہی وزیراعظم شاھد خاقان عباسی پارے کہ "ماما صاحب نن دا بارو ئٹ بس اللہ تعالیٰ آن دعا کننگ کینہ و نن داکان زیات ہچ کننگ کپنہ، غٹ زمہ وار توغت آتا مرضی و منشا ئست منکن و بے منکن مریسہ بننگ ءِ۔
ماما قدیر بلوچ پارے کہ ننے دعا تا آخہ بلکہ عملی اوڑدئی نا خواست ءِ، ایسکان مین اسٹریم سیاستدان عملی دروشم ئٹ دا بے قانودی دزگیری و زوراکی نا بیگواہی و بلوچ نسل کشی ءِ توننگ ئٹ تینا کڑد ءِ ایسری تفسہ ایسکا دا لڑ پین بیم تروک مریسہ ہنو۔
جسمم نا موہکش الہی بخش بکک پارے کہ اسہ قوم ئسے سندھی بلوچ پشتون کن اونا تاریخ و اونا تاریخ ءِ جوڑ کروکا تا اہمیت قومی وقار و قوم ئنا چاہنداری آن کم مفک و اندا زندہ غا قوم آک تینا شہید و ایلو جہد کار آک کوزہ گیر نا زیر تسلط مریرہ، ساندہ یات کننگ تون اوار اوفتا شرف ئٹ عقیدت نا جاگہ تریسہ اوفتا خذمت آتے تینا زند ئنا بے پنوکو بشخ اس جوڑ کیرہ۔
ماما قدیر بلوچ پارے کہ دا قوم سندھی بلوچ قوم مرغن ءُ غلامی سے آن بیدس اسہ زندہ ءُ قوم ئسے و اینو دا قوم آتا سیوتی اِرا گڑا ءِ پاش کرینے کہ دا ریاست پاکستان دا خوش فہمی ٹی مف کہ او ہزار آ بلوچ سندھی فرزند آتے زندان آتیٹ اذیت ایتو و اوفتا جون تے ہشیسہ بلوچ سندھی قوم آتے ساندہ تینا شیف آ کرو۔
