اواری نا درشانی کن ڈیرہ غازی خان آن وقار بلوچ، شعیب بلوچ، ابوبکر بلوچ تون اوار ایلو نرینہ و نیاڑیک کیمپ آ بسر۔
وی بی ایم پی نا وائس چئرمین ماما قدیر بلوچ جتا ٹولی تتون ہیت کریسہ پارے کہ بلوچستان ئٹ ریاست پاکستان پاش بےدادی برجاء تخانے، صوبائی و بنجائی حکومت آن زوراکی ئٹ بیگواہ مروکا بندغ آتا ویل ئنا بارو ئٹ تینا بیان آتے وار وار آ بدل کیرہ۔ بیگواہ غا بندغ آتا بابت ئٹ پارہ کہ او پاکستانی ادارہ آتون افس ولے گواچنی ٹی پنجاہ ہزار آن زیات بندغ آک پاکستانی عقوبت خانہ آتیٹ بند ءُ و ہڑدے مرک تون مون تننگ ءُ۔ ولے پاکستانی حکومت باز ڈوہداری انداز ئٹ دا ویل آن نمن کننگ ءِ۔
او پارے کہ جہانی برادری نا خن تیٹ مش شاغنگ کن پاکستانی حکومت کیہی مجلس اڈ تس و کیہی کمیٹی ہم جوڑا ولے ہچو کمیٹی اس اینو اسکا تینا رپورٹ آتے مونا ہتنگ کتو انتئے کہ بلوچستان اسہ چھاونی سے نا دروشم ءِ ہلکنے ہراڑے غٹ فیصلہ آتے فوج و ایجنسیک کیرہ۔ اگہ داڑے فوج و اونا اشارہ غا کاریم کروکا تا پاش بےدادی نا برخلاف کس توار بڑز کے تو اودے عبرت نا پیدواری جوڑ کننگ مریک۔ ایلو کنڈ آن بندغی حق آتا جہانی ادارہ آتا کڑد بیدس سالانہ رپورٹ آتیان ہچ اف۔ ہچو میکنزم اس اف و اینو اسکان ساڑی حالیت آتے کس مانیٹر کتنے۔
ماماقدیر بلوچ ودیک پارے کہ اسہ کنڈ آن ریاستی پارلیمان زوراکی نا بیگواہی تا توننگ و زوراکی نا بیگواہی تا آجوئی کن کمیشن و کمیٹی جوڑنگ ءِ و ایلو کنڈ آن درزن آ بندغ آتے ہمو ہفتہ آ زوراکی ئٹ بیگواہ کننگانے، ہرافتیٹ درو خضدار آن بیگواہ مروک اِرا خوانندہ سراج نور و عارف ھمبل ہم اوار ءُ، ہرافتا خاہوت آک برانز کننگ ءُ۔
اونا پاننگ ئس کہ داڑان بیدس بندغی حق آفا ادارہ آتا کنڈ آن زوراکی ئٹ بیگواہ مروک بندغ آتا خاہوت آتے ہچو قانودی کمک تننگتنے۔ اسہ باز اہمو ہیت اس دادے کہ اسہ بندغی حق آتا ادارہ اس ہرا کچ و حساب ءِ مسنگ پرسنز آتا بارو ئٹ شنگ کریسس اوفتے ہم وی بی ایم پی رد کرینے دا حالیت ئٹ ہر بروکا دے بلوچستان ئٹ خوانندہ و وکلیل، ڈاکٹر، سیاسی باسک و ایلو شعبہ آتیان تعلقداری تخوکا بندغ آک پاکستانی ایجنسی تا دو آن زوراکی ئٹ بیگواہ و شہید مننگ ءُ اندا سوب آن بلوچ قوم ءِ پاکستانی عدلیہ و ایلو ادارہ تیان ہچو اومیت اف۔
