اواری نا درشانی کروکا تیٹ بی ایس ایف نا کماش شکیل احمد بلوچ، بلوچ یکجہتی کمیٹی شال ئنا سعدیہ بلوچ، این ڈی پی نا بنجائی کمیٹی نا باسک شاہ میر کیمپ ئٹ برسہ اواری نا درشانی کریر۔
وی بی ایم پی نا وائس چیرمین ماما قدیر بلوچ ہمو وختا پارے کہ بلوچ لُمّہ و بلوچ راج ئنا ڈُکھ دڑد و حالیت ءِ خنسہ بلکن اسہ خل اُستی ءُ بندغ اس تینا خڑینک آتے تورے۔
ولے دا بلوچ راج ءِ ہرا ڈُکھ سہنگ آن پد ہم برداشت کننگ ءِ۔
و اندا برداشت نا آڑ ئٹی منہ بندغ سودا گری ٹی لگانو۔ ظُلم ءِ سگنگ بلوچ آ تیکن بیوسی سے انتئے کہ غُلام داڑان بیدس پین ہچ کننگ کپک نن بیوس و غُلام بلوچ آک تینا دلدار تا یلہ مننگ کن ایمنی ئٹ جُہد کرسہ جہان ءِ دا کُہلو ءِ اولی دے آن تسونن۔ نن غلامی نا طوق ءِ تینا لِخ آن کشنگ کن ہر وخت امن ئٹ جُہد کرسہ کرون۔ و بلوچستان آ پاکستان نا قوضہ نا برخلاف بلوچ ورنا تا بے نہاد ندری تا سوب آن بلوچ ویل اینو جہانی تلہ غا درستی راستی مسونے۔
ماما قدیر بلوچ پارے کہ بلوچ آتا پُر امن جُہد نئے بیرہ بلوچ راج ءِ بے چکاری نا تُغ آن بیدار کرے بلکن بلوچ آتے بلوچ پُر امن جُہد نا جُز جوڑِسہ اسہ رُژن ءُ تاریخ اس جوڑ کرینے۔ ایلو پارہ غان دا ام راست ئسے کہ جہان ئٹی ہراڑے ہم امن ئٹ جُہد اس مس اوتا سر سُہبی اُلس ئنا اواری آن منکن مس، بلوچ جُہد ءِ مزل اسکان سر کننگ و راجی چیدہ ءِ دوئی کننگ کن ہم اُلسی مُخ تفی و اواری بکار ءِ و بلوچ اُلس ءِ چاہنداری تننگ بلوچ سیاسی تاغت آتا فرض ءِ ولے دا معاملہ چپی ءِ کہ سیاسی طاغت آک راجی غرض آن زیات زاتی اُست خواہی تے ارزشت تننگ آ نظر بریرہ و لُمّہ غاک فریشان حال ئٹ تینا چُناتا یلہ مننگ کن دعا خوائنگ ءُ۔
ماما قدیر بلوچ ودیک پارے کہ ننا ٹِک و نظر ئٹ بلوچ پُر امن جُہد ءِ تدوکا منہ سال آن قلم خواجہ آک بھاز کمک فراوان کرے، و بلوچ نوشتکار کُل قبائلی و سیاسی خُڑکی تان مُر مرسہ بلوچ پُر امن جُہد نا دروشم ءِ سرحال جوڑِسہ مُچا بلوچستان ءِ چاہنداری تیر و ہر ہمو جیڑہ نا برخلاف نوشتہ کرسہ کیر ہرا بلوچ پُر امن جُہد ئنا برخلاف ئس۔ بھلا بھلا بُت آتے بلوچ نوشتکار آک تنقید نا ٹِک جوڑِسہ بلوچ راج ئنا سوب سختی و چٹی نا کسر آ انسا تینا فرض ءِ ایسری ایتر۔
