ریڈیو زْرمبش براہوئی | ریڈیو زْرمبش براہوئی,Mahal-baloch,Has-been-released,With-a-fine-of-5-lak-rupees,Stop-cruelty-onbaloch-nation-

سی ٹی ڈی نا دو آن زوراکی ئٹ بیگواہ مروکا و پدان دروغ ئنا کیس ئٹی مُسہ تو بندی مروکا ماہل بلوچ تدوکا دے ضمانت آ یلہ کننگا۔ 

ماہل بلوچ ءِ اینو شال ئنا ہدہ جیل آن یلہ کننگا، عدالت ئٹ پنچ لکھ روپئی ضمانت کن خواست کننگا۔ ماہل بلوچ نا یلہ مننگ ءِ اونا خڑک ئنا بندغ آک پک کرینو۔ 

یاتی مرے کہ 17 فروری نا نن ماہل بلوچ ءِ اونا اُراغان سی ٹی ڈی زوراکی ئٹ بیگواہ کرے، ہراکان گڈ اوڑا انسداد دہشت گردی نا دروغ ئنا کیس خلیسہ اونا دزگیری پاش کننگا۔ عدالت نا کنڈ آن مُسہ وار دہ دے ئنا ریمانڈ کن کاؤنٹر ٹیررزم ڈیپارٹمنٹ نا دو ٹی تننگا ہراکان ماہل بلوچ نا اعترافی ویڈیو ہم چنگ کننگا۔

ماہل بلوچ نا زوراکی نا بیگواہی و دزگیری نا برخلاف بلوچستان نا جتا عیلاقہ و شار تیٹ سیاسی، چاگڑدی و خوانندہ تنظیم آک برانز ہم کریر۔

ماھل بلوچ نا زوراکی نا بیگواہی و دزگیری نا بابت ئٹ جتا چاگڑدی و سیاسی تپہ آک تینا خلیس نا درشانی ءِ کریر، حکومت تون اوار بلوچ پارلیمانی پارٹی تے بھاز نغد کاری تون ہم مون تروئی تما۔ 

ماہل بلوچ آ بلوچ سلاہ بند تنظیم تون تعلقداری نا دوبہ خلنگاسس و دا نیام ئٹ ٹی وی چینل و ویڈیو تا ذریعت ئٹ اونا انٹرویوک ہم شنگ کننگار۔